افغانستان حکومتیگه اوتگن اون تورت ییل جریانیده کورسه تیلگن ییریک یاردملرگه قرهمی هنوزهم مملکتنینگ بعضی ولسواللیکلریده 14ییل جریانیده فقط بیر کیشی اون ایکینچی صنفنی بتیریشگه موفق بولیب، او هم بیر ماین پارتلشی نتیجهسیده اوز حیاتیگه نقطه قویگن.
بو، لوگر ولایتینینگ اوزاق منطقهسیده جایلیشگن «خروار» ولسواللیگی دیر. ایتیلیشیچه، بو ولسواللیک کابلگه یقین حدودده جایلشگن. شونینگدیک مذکور ولسوالیکنینگ اهالیسی اوتگن 14ییل جریانیده هم نابرقرارلیک، امکانیت بولمهگنلیگی همده صحی مشکللرگه روپه ره بولیب کیلگنلر.
خروار قوم یاش اولوغلری همده اوقوچیلرینینگ ایتیشیچه، بو ولسواللیک نینگ برچه معلملری سواد سیز دیر و اولرنینگ هیچ بیریده اون ایکینچی صنف بیترگنلیک حجتی هم یوق.
اولرنینگ سوزلریگه کوره، مذکور ولسواللیکده 11 مکتب موجود اولردن فقط 6تهسی نینگ ایشیگی یاپیق باشقه بیشتهسی نامده فعالیت قیلهدی.
خروار ولسواللیگی قوم یاش اولوغلریدن بیری داکتر ناصر، اوشبو آلتی مکتب هم معارف ادارهسی نینگ تفاوت سیزلیگی سبب ایشیگی اوقوچیلر یوزیگه یاپیق حالده قالماقده دیر.
اونینگ ایتیشیچه، اوتگن 14ییل جریاینیده فقط بیر اوقوچی اون ایکینچی صنفنی بیتیریشگه موفق بولگن، او هم ولایت مرکزی بولیمش پل عملگه کانکور سیناوینی اوتکزیش اوچون شهرگه سفر قیلگنده بیر ماین پارتلشی عاقبتیده هلاک بولگن.
شونینگدیک بو ولسواللیکنینگ قوم یاش اولوغلریدن باشقه بیری محمد، خروار مکتبلرینینگ برچه اوقیتووچیلری امام مسجدلری همده سوادسیز کیشی لردیر دیگن.
خروار ولسواللیگیده هنوزگچه قیزلر اوچون مکتب بولمهگنی ایتیلهدی.
خروار ولسوالی ثمرگل راشدنینگ سلام وطندارگه ایتیشیچه، اورگهتیش و اورگهنیش لایحهسی اوشبو ولسواللیکده بوتونلی اورتهدن کیتگن. اوتگن اون تورت ییل جریانیده بیر اوقوچی هم مذکور ولسواللیکدن بیلیم یورتگه یول تاپمهگن.
جناب راشد، مساله اوچون نیچه مرته ولایت معارف ادارهسی مسووللری بیلن بحث قیلگنلیگینی ایتگن. اما، هنوزگچه هم ولایت معارف ادارهسینینگ رسمیلری بو ولسواللیک معارف قیینچیلیکلریگه اعتبار بیرمهگنلر.
خروارده معارف ادارهسیدهگی موجود معمالرنی تصدیقلهگن ولایت معارف ادارهسی نینگ رسمیلری، خوفسیزیلیکلر، یولنی اوزاقلیگی سبب ملکهلی استادلر اوشبو منطقهگه کیلیب درس بیریشگه حاضر بولمهگنلیکلرینی ایتگنلر.
اما، لوگر معارف ادارهسینینگ معاونی محمد صادق استانکزینینگ سوزلریگه کوره، معارف وزیرلیگی اون بیر مکتب نینگ بناسینی اوشبو ولسواللیکده قورگن. ایتیلیشیچه، 3مینگگه یقین باله مذکور مکتبلرده درس و تعلیم بیلن شغللنماقده.
استانکزی، حاضرگی کونده مذکور ولسواللیکده 78اوقیتووچی موجودلیگینی ایتگن. اولردن فقط 8تهسی اون ایکینچی صنفنی بیتیرگنلر و قالگن لری ایسه مسجدلر امامی دیر.
لوگرنینگ خروار و ارزه ولسواللیکلریده هنوزگچه قیزلر اوچون مکتب بولمهگن لیگی ایتیلهدی. اوتگن بیر آیدن بیری اوشبو ولایتنینگ برهکی برک و چرخ ولسواللیکلریده قیزلرگه قرهشلی 12 مکتب نینگ ایشیگی یاپیلگن.
عین حالده، افغانستان اوچون امریکهنینگ مخصوص تیکشروو ادارهسی (سیگار) افغانستان معارف وزیرلیگینینگ ایریم بلند مرتبهلی رسمیلری جملهدن سابق معارف وزیری فاروق وردکنی مذکور وزیرلیک مادی امکانیتلرینی حیف و میل قیلگنلیک همده خیالی مکتبلر قورگنلیکده عیبلهگن ایدی.
