جمهور رییس سوزلاوچیسینینگ اورین باسری سیدظفر هاشمینینگ ایتیشیچه، حاضرگه قدر تینچلیک سوزلشوولری شرایطی، جملهدن آچیق و افغانستانده بولیشی و شونینگدیک بو سوزلشوولرده ایرکین صورتده اشتراک ایتیش بیللی بولمهگن و اوشبو شرطلر بیللی بولسه تینچلیک سوزلشوولری باشلنهدی.
جمهور رییس سوزلاوچیسینینگ اورین باسری شوندهی بیرحالده تینچلیک سوزلشوولریگه زمینه یرهتیلمهگنی توغریسیده اشاره قیلگن کیم، حاضرگهقدر افغانستان حکومتی تورت مرته طالبلر بیلن ییغین اوتکزگن؛ ایکی ییغین «پگواش» آتلی اداره همکارلیگی و باشقه ایکی ییغین ناروی مملکتیده اوتکزیلگن. شونینگدیک یقینده چیننینگ ارومچی شهری طالبلر بیلن اوتکزیلهدیگن تینچلیک سوزلشوولرینی کوتیب آلهدی.
بیراق حکومت نیچهمرته بو ییغینلرنی رسمی ایمس دیب، اوشبو ییغینلرده اشتراک ایتکن کیشیلرنینگ حکومت تمانیدن یوباریلمهگنلیگینی ایتکن.
شونینگدیک افغانستان تینچلیک یوکسک کینگشی سوزلاوچیسی شهزاده شاهدنینگ ایتیشیچه، بو سوزلشوولر رسمی سوزلشوولرگه زمینه یرهتهدی. جناب شاهدگه کوره، دولتگه قرشی گروهلر بو فرصتلردن افغانستان تینچلیگی اوچون ایش آلیشی لازم.
عین حالده، جمهور رییس سوزلاوچیسینینگ ایتیشیچه، حکومت تیزلیکده تینچلیک سوزلشوولر باشلهنیشیگه امید بیلدیرهدی. اونگه کوره، حکومت هر بیر کیشی، اداره و هر بیر مملکت، تینچلیک سوزلشوولر اوتکزیلیشی و افغانستان تینچلیک لایحهسی یوتوقلیگی اوچون همکارلیک قیلسه اونی خوش کوتهدی.
باشقه تماندن، پاکستان باش وزیرینینگ ملی امنیت و خلق ارا ایشلری بوییچه ییریک مصلحتچیسی سرتاج عزیزگه کوره، بو مملکت تیزلیکده طالبلر بیلن اوتکزیلهدیگن تینچلیک سوزلشوولری باشلهنیشیگه زمینه یرهتیب و بو گروهنی مذاکره میزی اوستیگه حاضرلهیدی.
بونگه قوشیمچه، اجراییه ریاستی سوزلاوچیسی جاوید فیصلنینگ یکشنبهکونی «سوزلاوچیلر تمانیدن میدیاگه معلومات بیریش» ناملی ییغینده ایتیشیچه، پاکستان حاضرگهقدر افغانستانگه بیرگن سوزلریگه عمل قیلمهگن. اونگه کوره، پاکستان هیچقچان افغانستان برابریده صادق بولمهگن.
طالبلر بوندن آلدین تینچلیک یوکسک کینگشی اعضالری بیلن اوتکزگن اولتیریشلریده، تینچلیک سوزلشوولری باشلهنیشیگه نیچه تکلیف قیلگن ایدی.
گزارشلرگه کوره، اوشبو گروه محبوسلرینینگ افغانستان قماقخانهلریدن قوییب یوباریلیشی، چیت ایللیک کوچلرنینگ بوتونلهی چیقیشی و اساسی قانوننینگ اوزگریشی مذکور گروه تکلیفلریدن ایکن.
ملی بیرلیک حکومتی ایشیگه باشلهگنیدن، بو گروهنی مذاکره میزی اوستیگه حاضرلشگه سعی و حرکت قیلیب کیلگن.
افغانستان جمهور رییسی محمداشرف غنی، تینچلیککه قول تاپیشنی حکومت اصلی ایشلریدن بیری دیب بیلهدی و دولتگه قرشی گروهلرنی مذاکره میزی اوستیگه حاضرلش اوچون نیچه مرته پاکستان، عربستان و چینگه سفر قیلدی.
