نماینده‌لر کینگشی بیرینچی اورین باسری ظاهر قدیرگه کوره، پاکستان، افغانستان داعش گروهی اوچون زمینه یره‌ته‌دی.
شنبه کونی نماینده‌لر کینگشی‌نینگ عمومی ییغینی‌ده سوزگه چیقیش قیلگن جناب ظاهر قدیرنینگ ایتیشیچه، پاکستان حکومتی ننگرهار ولایتی شینواری تومنی‌ده طالب‌لرنی اورته دن کوتریب، بو منطقه‌ده داعش جنگری‌لرینی جایلشتیره‌دی.
اونگه کوره، بو منطقه‌ده مزایل آتیشی بیلن طالب‌لر اوستیگه هجوم اویوشتیرگن.
جناب قدیرنینگ کوپه‌یتیریشیچه، داعش گروهی عایله اعضاسی بیلن پاکستان حمایه‌سی‌ده طالب‌لر اورنیده شینواری تومنی‌ده جایلشگن. نماینده‌لر کینگشی‌نینگ بیرینچی اورین باسری‌گه کوره، حاضرگی کونلرده داعش گروهی ننگرهار ولایتی لعل پور تومنی‌نی قول گه آلیش اوچون سعی و حرکت قیلماقده.
اونینگ ایتیشیچه، بو گروه پاکستان حمایه‌سی‌ده لعل پور تومنی‌دن کیین کامه و گوشته تومن‌لری‌نی قول‌ده کیریتیش‌گه قصد قیلگن. جناب قدیرگه کوره، بو منطقه‌ده طالب‌لرنینگ نفوذی بولمه‌گن، داعش آسان‌لیک‌که منطقه‌نی تصرفیگه آله‌دی.
ننگرهار نماینده‌لری‌نینگ کوپه‌یتیریشیچه، اوشبو گروه گوشته تومنی‌نی قولگه کیریتکنیدن کیین کنر و نورستان ولایت‌لری ایریم بولیمی‌نی قمراوگه آلیش‌گه قرار قیلگن.
ظاهر قدیرنینگ خلق‌قه قره‌تیب ایتیشیچه، پشتون‌لر یشه‌یدیگن منطقه‌لرده داعش گروهی جایلشتیریش سعی وحرکتی پاکستان تمانیدن بولیب کیلماقده.
شونینگ‌دیک جناب قدیرنینگ ایتیشیچه، پاکستان، ننگرهار، کندهار و پکتیاولایتلریده داعش گروهی‌نینگ اویاب بولیشی‌نی ایسته‌یدی و بوندن کیین، مذکور گروه فعالیت‌لرینی مملکت شمالی‌ده انتقال بیره‌دی.
نماینده‌لر کینگشی بیرینچی اورین باسری‌نینگ بوسوزلری، کمیده بیر هفته آلدین طالب‌لرنینگ ننگرهار ولایتی‌ده نام‌لنگن والی‌سی مولوی احمدگل؛ پاکستان‌نینگ ایبت‌آبا منطقه سیده، اویینی اونگیده ناتانیش قوراللی کیشی‌لر تامانیدن اولدیریلگن بیرچاغده بیان ایتیلگن ایدی.
دیمک، داعش گروهی تامانیدن ترقه‌تیلگن صورت‌لرگه کوره، بو گروه‌گه تیگیشلی کیشی‌لر ننگرهار ولایتی کوت تومنی‌ده مذکور گروه‌نینگ تبلیغاتی ورقلرینی اوقووچیلر، آق‌سقال‌لر، یاشلر، قیشلاقلر، مسجدلر و مکتب‌لرده ترقتگنینی کورسته‌دی.
بو صورت‌لرگه کوره، داعش گروهی‌نینگ نقابلی و نقاب‌سیز کیشی‌لری تینچ‌لیک‌ده خلق دقتی‌نی جلب ایتیش اوچون بو گروه‌نینگ تبلیغاتی ورقلرینی ترقتماقده. صورت گه معلوم بولیشیچه، خلق و اوقووچیلر یخشی علاقه بیلن بو ورق‌لرنی اوقیدی.
باشقه تاماندن، نیچه کون آلدین داعش جنگری‌لری ننگرهار ولایتی چپرهار تومنی و کنر ولایتی‌ده ایکی ملانی طالب‌لر اوچون جاسوس‌لیککه عیب‌لب باشینی کیسگن ایدی.
عین حالده، امیریکه مدافعه وزیرلیگی (پنتاگون) افغانستان‌ده‌گی طالب‌لر و داعش گروهی اورته سیده تیزلیکده توقنه شوولر باشله‌نیشی‌نی ایتکن.
