بدخشان ولایت سرپرستی شاه ولیالله ادیبنینگ ایتیشیچه، ایرتهلب ساعت 7 دن باشلهب ولایت ناتینچ محلهلریده پاکلش عملیات باشلنگن و حاضرگه قدر عملیات یوتوقلربیلن آلغه بارماقده.
جناب ادیبگه کوره، مذکور عملیات اردو، ملی پولیس و ملی امنیت کوچلری بیرگه لیگیده باشلنگن و عملیات رهبرلیگی اردو ستادینینگ اورین باسری جنرال مرادعلی مراد عهده سیگه ایکن.
شونینگدیک بدخشان عامه نظم کوچلرینینگ باشلیغی جنرال زمری پیکاننینگ ایتیشیچه، جنگری طالبلر جرم تومنینینگ خُستک دره سیده امنیتی کوچلر محاصره سیگه قالگن.
اوچ هفته آلدین جنگری طالبلرنینگ اردو کوچلریگه قرشی هجوم ایلتیشلری نتیجه سیده 30 آشه کیشی اردو کوچلریدن هلاک بولیشی عاقبتیده، مرکزی حکومت بدخشاندهگی قورالی جنگریلرنی نابود ایتیش اوچون یوکسک عملیات اوتکزیلیش بویریغینی بیرگن.
فراهده 12 طالب اولدیریلدی
فراه محلی رسمیلریگه کوره، جنگری طالبلر ولایت ایکی تومنیده گروهی هجوم ایلتیشلری عاقبتیده 12 جنگری طالب اولیب، باشقه 21 تهسی هم تن جراحت آلگن.
ولایت رسمیلرینینگ ایتیشیچه، جمعه کونی ایرتهلب ساعت 5 ده جنگری طالبلردن 370 گه قدر گروهی شکلیده بالابلوک و چهار باغ تومنلرینینگ شیون و پشت رود قیشلاقلریده هجوم ایلتیشلری بیلن اوتگن کیچه ساعت 10 گه قدر اوروشلر دوامی بار ایدی.
فراه اردوسینینگ سوزلاوچیسی عبدالرؤوف رحمانینینگ سلاموطندارگه ایتیشیچه، توقنه شولر نتیجه سیده طالبلر تانیقلی قومندانلریدن ملاجمعهخان و ملابرهانالدینلر قوشیمچه 12 جنگری طالب هلاک بولگن و باشقه 21 تهسی هم تن جراحت آلگن.
رحمانیگه کوره، مذکور توقنه شووده اردوکوچلریدن3 کیشی هلاک بولگن و باشقه 7 کیشی هم تن جراحت آلگن. شونینگدیک رحمانینینگ کوپهیتیریشیچه، اوروش محله سیده جنگریلردن کوپلب اوق و قورال قالگن ایکن.
طالبلر هم واقعهنی تأیید قیلگن، اما افغانستان امنیتی کوچلریگه آغیر تلفات ایتکیزگنلیکلرینی تیلگه آلگن.
موندن آلدین هم طالبلر عزم ناملی عملیاتنی دولتگه قرشی جمعه کونی باشلهنیشیدن خبر بیرگن اید. مذکور جنگریلر جمعه کیچهسی یریمیدن باشلهب اولکه ایریم ولایتلریده امنیتی کوچلر پوسته سیگه هجوم ایلتگن ایدیلر. اما امنیتی رسمیلرینینگ ایتیشیچه، جنگریلر هجومیگه قرشی حرکت قیلیب اولر آلدینی آلگن ایکنلر.
