یوه میاشت مخکې د ولسمشر په فرمان د نفوسو د ثبت او احوال په قانون کې د برېښنایي تذکرو په اړه ځېنې تعدیلات راغلل. له دې وروسته د ملي شورا ځینو غړو په وار ـ وار غوښتنه کړې، چې د ملي شورا تقنیني کال له پرانیستنې وروسته باید دا قانون د یوې میاشتې په اوږدو کې د تصویب لهپاره ورلیږل شوی وی؛ خو لا نهدی ورلېږل شوی.
د ولسي جرګې دویم مرستیال محمد نذیر احمدزی بیا سلام وطندار ته وویل، چارواکو ډاډ ورکړی، د نفوسو د ثبت او احوال په قانون کې د تعدیلاتو فرمان به په روانه اوونۍ کې ولسي جرګې ته وراستول شي.
د چارو کتونکي بیا وایي، حکومت باید دا کار پخوا کړی وی او د ملي شورا د کار له پیل سره سم یې د نفوسو د ثبت او احوال د قانون تعدیلات د تصویب په موخه وراستولی وی.
د چارو څېړونکی فیض محمد ځلاند وایي، حکومت غواړي د برېښنایې تذکرو په ځنډولو سره ځانته دلایل پیداکړي او ټاکنې وځنډوي.
د نوموړي پر وینا په حکومت کې دننه چارواکي هڅه کوي دا ملي بهیر سیاسي کړي او له بلې خوا د نفوسو د ثبت او احوال اداره هم یو قوم په لاس کې نیولي ده، چې دا هم یو ګواښ دی.
خو په همدې حال کې د ولسمشر ځای ناستی ویاند شاه حسین مرتضوی په خبري غونډه کې وویل، ډېر ژر به د نفوسو د ثبت او احوال قانون د تعدیلاتو په اړه د ولسمشر فرمان ملي شورا ته واستول شي.
د نفوسو د ثبت او احوال د قانون طرحه تردې وړاندې هم د ملي شورا له خوا تصویب شوې وه، خو کله چې د افغان کلمه ورڅخه ووېستل شوه؛ د یو شمېر سیاسي او مدني فعالانو کلک غبرګونونه یې راپورته کړل له مخې یې بېرته په دې قانون کې تعدیلات راوستل شول او د افغان کلمې ترڅنګ د قوم نوم او دین په کې ورزیات شول.
