د کلیو پراختیا او بیا رغاونې وزارت چارواکي وايي، چې د ولسي تړون کړن لاره په نوي لمریز کال کې پېل شي.
د معلوماتو پر بنسټ، د ولسي تړون کړنلاره د روغتیا، پوهنې، د څښاک اوبو، بریښنا او کرنیزو زیربناوو په برخو کې د پرمختیایي شوراګانو له لارې خدمتونه وړاندې کوي.
د کلیو پراختیا او بیارغاونې وزیر نصیراحمد دُراني د شنبې ورځ کابل کې د خبري غونډې پرمهال د ملي پیوستون کړن لارې پای او د ولسي تړون کړن لارې پیل اعلان کړ.
دُراني وویل، د ولسي تړون کړن لاره د راتلونکي وري میاشتې له لومړۍ نیټې پیلیږي.
د هغه پروینا، د ولسي تړون کړن لاره د افغان ډلې له خوا د نړیوال بانک په په تخنیکي همکاري د شپږو میاشتو په اوږدو کې طرح او ډیزاین شوې او د پیل له پاره یې ټول پړاوونه د بشپړیدو په حال کې دی.
دُراني زیاته کړه، د ولسي تړون کړن لاره د لسو کلونو له پاره ډیزاین چې په لومړيو څلورو کلونو کې یې لګښت یو میلیار امریکایي ډالر اټکل شوی.
"د ولسي تړون کړن لارې عملي فعالیت د ۲۰۱۷ کال له اپریل او مارچ یانې د وري او غوایي میاشت کې د افغانستان له ولسوالیو پیلیږي."
د کلیو پراختیا او بیارغاونې وزیر نصیر احمد دراني پروینا د ولسي تړون کړن لاره کې د فساد مخنیوي له پاره میکانیزم په پام کې نیول شوی.
دغه راز، خبري غونډه کې ښاغلي دراني د ملي پیوستون کړن لاره چې په تیرو ۱۴ کلونو کې د افغانستان په کلیو کې پلې شوې بریالۍ وبلله زیاته یې کړه چې په دې موده کې ۱،۵ میلیارده ډالر پرې لګیدلي چې ۷۰ ٪ یې د پرمختیایي شوراګانو له لارې لګول شوي دي.
دُراني وایي، چې د ملي پیوستون کړن لارې پر بنسټ ۸۶ زره پروژې د سرکونو، د څښاک اوبو کانالونو، لمریزې بریښنا، د ښوونځیو ټولګیو، ټولنیزو سالونونو او روغتونونو جوړولو په برخو کې پلې شوې دي.
