.jpg)
د افغانستان کرکټ بورډ وايي، ګلبدین نایب او دولت ځدران به هم روانه میاشت د عربي اماراتو په کوربتوب سیالیو کې د افغانستان کرکټ ملي لوبډلې په ګټه ولوبېږي.
د کرکټ بورډ مرستیال عمومي مشرحاجي عزیزالله فضلي سلام وطندار سره په خبرو کی وویل، ګلبدین نایب او دولت ځداران د افغانستان د کرکټ مهم لوبغاړي به د عربي اماراتو پر خلاف ۲۰ اوریزو سیالیو کې ولوبېږي.
ګلبدین نایب د وروستي ځل له پاره د هندوستان په کوربتوب د روان کال ۶م پړاو ۲۰ اوریزو کرکټ نړیوال جام سیالیو کې ولوبېد او خپله وروستۍ نړیواله ۵۰ اوریزه لوبه یې د روان کال په جولای میاشت کې په ایرلینډ کې د ایرلینډۍ کرکټ ملي لوبډلې پر خلاف وکړه او له هغې راهیسې د نامعلوم دلیل له کبله له کرکټ ملي لوبډلې څخه لرې شوی و.
.jpg)
دغه راز دولت ځدران بیا خپلې وروستۍ سیالۍ ۲ میاشتی مخکې د بنګله دېش کرکټ ملي لوبډلې پر خلاف د ۳ پنځوس اوریزو لوبو په (سیریز) کې وکړې.
دیادونې وړ ده چې دولت ځدران د افغانستان کرکټ بورډ لخوا ملي لوبډلی ته په برابر شوي فیزیکل فټنس کمپ او دغه راز د احمد شاه ابدالي په ۴ ورځنیو سیالیو کی هم ګډون ونکړ.
د کرکټ بورډ مرستیال عزیز الله فضلي وویل، دولت ځدران د کورنۍ ستونزو له کبله په برابر شوي فزیکل فېټنس کمپ او د احمد شاه ابدالي په ۴ ورځنیو کورنیو کرکټ سیالیو کی ونه لوبېد.
د فضلي پر وینا، دولت ځدران د ۴ ورځنیو سیالیو په منځ کی په کابل کې و او راتلونکې اونۍ به د عربي اماراتو پر خلاف ۳ نړیوالو ۲۰ اوریزو کرکټ سیالیو کې د لوبېدو په موخه عربي اماراتو ته ولېږل شي.
.jpg)
نوموړي زیاته کړه، عربي اماراتو ته لېږل شوې ۱۷ کسیزه لوبډله یوازې د انګلستان (لاینز) لوبډلې پر خلاف ۴ ورځنۍ سیالۍ ته غوره شوي او د ۲۰ اوریزو لوبو له پاره به ډېر ژر بله لوبډله اعلان شي.
د کرکټ بورډ مرستیال عمومي مشر د فضل نیازي، منیر احمد او ضمیر خان په شمول د یو شمېر ښو لوبغاړیو په اړه وویل، چې دوی به د افغانستان په (الف) کرکټ ملي لوبډله کې د سیالیو له پاره زمبابوی ته ولېږل شي او د انګلستان لاینز پر خلاف غوره شوې ۱۷ کسیزه لوبډلې تر ټولو غوره لوبغاړي به په ملي لوبډله کې ولوبېږي.
ټاکل شوې ده، د افغانستان او انګلستان (الف) کرکټ ملي لوبډلو ترمنځ به د ډېسمبر په ۷ مه نېټه پیلېدونکې ۴ ورځنۍ سیالۍ وروسته د ډېسمبر پر ۱۴ مه نېټه افغانستان له کوربه عربي اماراتو سره د ۳ شل اوریزو لوبو لړۍ پیل کړي.
