ولسمشر محمد اشرف غني د یو فرمان پر اساس د ټاکنیزو کمېسيونونو پخواني غړي د پخوانيو امتیازاتو په لرلو سره په بېلابېلو برخو کې د خپلو سلاکارانو په توګه ټاکلي دي.
د ولسي جرګې، مدني ټولنو او د پوهنتون یو شمېر استادان د ولسمشر دا ګومارنه د ملي ګټو سره په ټکر او ناقانونه بولي. دوی نیوکه کوي، چې د سلاکارانو په توګه د ټاکنیزو کمېسيونونو د پخوانيو غړیو ګومارل په ټاکنو کې په درغليو سترګې پټول دي.
د دوی پر وینا، د ولسمشر د سلاکارانو په توګه د پخوانيو کمېشنرانو ټاکنه په ډاګه کوي، چې ولسمشر غني د تېرو ټاکنو په درغليو د پردې اچولو هڅه کوي.
د پوهنتون استاد طاهر هاشمي وايي، ولسمشر غني له قانون او حقوقي مسایلو څخه د ناسمپوهاوي له کبله د ملي ګټو په خلاف د ټاکنیزو کمېسيونونو غړي د خپلو سلاکارانو په توګه ټاکلي دي.
هاشمي زیاتوي، په حکومت کې روانه دیکتاتوري د خلکو او حکومتي چارواکيو ترمنځ د واټن سبب شوې ده.
دی په دې باور دی، چې د ارګ له خوا دا ټاکنه ښکاره کوي، چې کمېشنران د تېرو ولسمشریزو ټاکنو په درغليو کې شریک و.
د مدني ټولنې غړي عبدالودود پدرام سلام وطندار ته وویل، دغه ګومارنه په تېرو ولسمشريزو ټاکنو کې د درغليو د رازونو د پټولو له پاره شوې ده.
پدرام زیاتوي، د سلاکارانو په توګه د ټاکنیزو کمېسيونونود پخوانيو غړیو ګومارنه په ډاګه کوي، چې د ښې حکومتوالۍ او فساد پر وړاندې مبارزه د ولسمشر هسې شعارونه دي.
دا مدني فعال د اندېښنې په څرګندولو سره وایي، چې د معافیت فرهنګ ورځ تر بلې مخ په زیاتېدو دی.
دی وايي، دغه اشخاص باید د ټاکنیز بهیر د بې اعتباره کولو پر سر څارنوالۍ ته ورمعرفي شوي وی.
د ولسي جرګې غړي عبدالراحمان رحماني هم تېره ورځ د ولسي جرګې عمومي غونډې ته وویل، د ولسمشر په فرمان سره د ټاکنیزو کمېسيونو د پخوانيو کمېشنرانو د سلاکارانو په توګه ګومارنه د اساسي قانون خلاف کړنه ده.
په همدې حال کې د اجرايوي رياست مرستیال ویاند امید میثم سلام وطندار ته وویل، چې د سلاکارانو په توګه د پخوانيو کمېشنرانو ټاکنه د ولسمشر غني تصمیم دی. د ملي یووالي د حکومت په کچه دا پرېکړه نه ده شوې، ځکه دوی په دې برخه کې کار نه لري.
هڅه مو وکړه چې په دې اړه د ولسمشرۍ ماڼۍ نظر هم واخلو؛ خو د ولسمشر د ویاند مرستیال شاه حسین مرتضوي په دې اړه له څه ویلو ډډه وکړه.
تېرې ولسمشريزې ټاکنې د افغانستان په تاریخ کې کړکېچن انتخابات ګڼل کېږي او ویل کېږي، چې د درغلیو د لوړې کچې ادعا د دې لامل شوه، چې د ډاکټر محمد اشرف غني او ډاکټر عبدالله عبدالله ټاکنیز ټیم یو هم له خپل دریځه تېر نه شول، چې په پایله کې یې د امریکا د بهرنيو چارو وزیر جان کېري د منځ ګړیتوب په واسطه د ملي يووالي حکومت جوړ شو.
