د افغانستان ولسمشرۍ ماڼۍ وايي، چې له دې وروسته ټول دولتي ویاندویان خبریالانو ته د معلوماتو په ورکولو کې مکلف دي.
د ولسمشر ویاند هارون چخانسوري نن کابل کې خبري غونډې ته وویل، چې د حکومت ویاندویان، والیان، وزیران او مسوولین مکلف دي چې خبریالانو ته کره او پر وخت معالومات ورکړي.
چخانسوري زیاته کړه، چې د حکومت ویاندویان نه یوازې له خبریالانو سره خبرې وکړي بلکې هغه معالومات، چې د قانون له مخې یې هغوې غواړي هم ورکړي.
نوموړي زیاته کړه:" وزیران، د مرکز او ولایتونو مسوولین او والیان مکلف دي، چې په میاشت کې یو ځل د خپلو فعالیتونو رپوټ رسنیو ته ورکړي، هغوی مکلف دي چې د اطلاعاتو د تبادلې په موخه هره ورځ ۱۵ دقیقې د خپلو بنسټونو ویاندویانو ته وخت ورکړي چې اطلاعات ورکړي. "
د چخانسوري پر وینا د ولسمشر په دغه حکم کې راغلي ،چې په مرکز او ولایتونو کې هر دولتي بنسټ باید د مسولو بنسټونو درې شمیرې او پته له رسنیو سره شریک کړي.
په همدې حال کې د ازادو رسنیو ملاتړ بنسټ کې د رسنیو څار مسوول صدیق الله توحیدي د ولسمشر دغه حکم هرکلی، خو پر عملي کیدو یې ټینګار کوي.
توحیدي وایي، چې د حکومت ویاندویان نه باید له رسنیو اطلاعات پټ کړي او له خبریالانو سره د تاوتریخوالي وروستیو پیښو لامل هم د دولتي بنسټونو د معالومات نه شریکول دی.
دا داسې مهال ده چې ولسمشر دوه کاله مخکې د لوړې له مراسمو وروسته معالوماتو ته د لاسرسي قانون توشیح کړ، خو لا هم ځینې دولتي بنسټونه پر وخت اطلاعات او معالومات رسنیو ته نه ورکوي.
