ویل شوي په کابل کې به سبا (دوشنبه می ۱۶مه) د بامیانو له لارې له ترکمنستانه د وارداتي بریښنا مزي غځېدو پلویان لاریون وکړي.
خو د افغانستان د جهادي او ملي ګوندونو شورا نن (یکشنبه می ۱۵مه) په کابل کې خبري غونډې ته وویل، دوی له دوو ورځو راهیسې هلې ځلې کوي، چې د مرکزي بامیان او دایکندي ولایتونو خلک دې لاریون نه کوي او حکومت دې د بریښنا لیږد په اړه د وزیرانو شورا مصوبه یو څه وځنډوي.
د یادې شورا د سیاسي کمیټې غړي او ویاند سید حامد ګیلاني وویل، چې په اوسنیو شرایطو کې دغه ډول لاریونونه د هیواد په ګټه نه دي، دده پر وینا ښایي په دې سره ستونزې رامنځ ته شي.
ګیلاني وړاندیز وکړ، چې دا مسله دې یوه کمیټه د تفاهم له لارې حل کړي او ددوی شورا د منځګړیتوب له پاره چمتو ده.
دوی وايي، چې له دغو لاریونونو به د افغانستان دښمنان ګټه واخلي.
له ترکمنستانه د وارداتي بریښنا مسله هغه وخت لانجمنه شوه، چې حکومت اعلان وکړ؛ چې ددې بریښنا مزی به د سالنګ له لارې کابل او وروسته سویل ختیځو، سویلي او سویل لویدیځو ولایتونو ته وغځول شي.
خو دې چارې حساسیتونه راپورته کړل او یو شمېر هغو يې غوښتنه وکړه، چې د برېښنا دا مزی دې د بامیانو له لارې وغځول شي.
د دغو اعتراض کوونکو زیاتره خلک د افغانستان د مرکزي ولایت او دایکندي اوسېدونکي دي.
خو حکومت وایي، چې د سالنګ لاره ارزانه، کم لګښته او پروژه په لنډ وخت کې بشپړیږي او له دې پرته د پروژې تمویلونکي هم چمتو نه دي چې پیسې ورکړي.
