په هرات کې د ماین پاکۍ موسسې ۱۵ تښتول شوي کارکوونکي خوشې شول

د هرات ولایت د ځايي چارواکیو په خبره، تېره ورځ ناوخته د «هلوټرست» موسسې تښتول شوي کارکوونکي د امنیتي ځواکونو د عملیاتو په ترڅ کې د دغه ولایت د کهسان ولسوالۍ په «شبش» سیمه کې راخوشې شول.

دا کسان د تېرې جمعې پر ورځ مازدیګر مهال د موسسې له څلورو موټرو سره تښتول شوي وو.

د دغه ولایت د پولیسو امنیه قوماندانۍ ویاند عبدالروف احمدي وايي، چې د ماین پاکۍ د موسسې دغه ۱۵ تنه کارکوونکي له کومې معاملې پرته خلاص شوي دي.

احمدي وايي، چې د هلوټرسټ موسسې کارکوونکي د ملاحیدر او ملا توپان د وسله والو کسانو له خوا تښتول شوي وو.

ملاحیدر او ملا توپان په هغه سیمه کې د وسله والو طالبانو قوماندانان دي.

د هرات د امنیې قوماندانۍ ویاند وايي، له پېښې وروسته پولیسو عملیات وکړل او د ملا حیدر او ملا توپان ۷ تنه وسله وال کسان یې ونیول، چې د نیول شویو کسانو له لوري د تښتول شویو کسانو پل تعقیب شو، چې په پایله کې یې تښتول شوي کسان را خوشې کړل.

په ورته وخت کې د هرات ولایت مطبوعاتي مسوول جیلاني فرهاد وايي، چې دغه کسان د امنیتي ځواکونو د هڅو او د قومي سپین ږیرو د منځګړتوب په نتیجه را خوشې شوي دي.