د ولسي جرګې په نننو ټاکنو کې د دې جرګې د اداري پلاوي د ټاکلو له پاره رايي اچونې وشوې.
د ولسي جرګې د دویمې ورځې په عمومي غونډه کې د نایب منشي څوکۍ نوماندانو عرفان الله عرفان د وکیلانو د باور په ۱۲۸ رايو او روابه پرواني په ۴۷ رایو سره د دې جرګې نایب منشيان شول.
د د دې جرګې په نننۍ (سه شنبې) غونډه کې وکیلانو ۲۱۶ رایې وکارولې، چې د ۵۰+۱ باور رایو له پاره باید هر نوماند د وکیلانو د باور ۱۰۹ رایې ترلاسه کړي.
بل خوا د ولسي جرګې لومړي نایب څوکۍ ته عبدالظاهر قدیر او میرویس یاسینی نوماندان وو، چې ظاهر قدیر ۹۳ او میرویس یا سیني د وکیلانو د باور ۸۰ رایې ترلاسه کړې؛ خو یو هم ۵۰+۱ رایې پوره نه شوې کړی.
دغه راز، د ولسي جرګې دویم نایب څوکۍ ته نوماندانو، نذیر احمد احمدزي ۱۰۲ او عبدالقیوم سجادي ۷۲ د بارو رایې ترلاسه کړې، چې یو هم ۵۰+۱ رایې پوره نه شوې کړی.
دا په داسې حال کې ده، چې د ولسي جرګې د تېرې ورځې د اداري پلاوي په ټاکنو کې عبدالروف انعامي وتوانېدلو، چې د ولسي جرګې منشي څوکۍ د ۱۱۷ باوري رایو په ترلاسه کولو سره د دې جرګې منشي شي.
د نن ورځې په عمومي غونډه کې د ولسي جرګې رییس عبدالروف ابراهیمي پرېکړه وکړه، چې د لومړي او دویم نایب ټاکنې به سبا وشي او په همدې سره غونډه پای ته ورسېدله.
