امنیتي چارواکي وايي چې په هلمند کې یې د سرحدي پولیسو ۲۲ سرتیري وژل شوي.
سرچېنې په دې شرط چې نوم یې په ډاګه نه شي سلام وطندار ته ویلي دي، چې د هلمند ولایت په نوزاد ولسوالي کې د افغان سرحدي پولیسو پر ۲ پوستو وسله والو طالبانو برید کړی دی او دغه پوستې یې په بشپړ ډول له منځه وړي دي.
د سرچېنې پر وینا په دغه برید کې ۲۲ افغان سرحدي پولیس وژل شوي دي، ۷ تنه ټپیان شوي او ۶ تنه نور لادرکه دي.
دغه برید تېره ورځ په نوزاد کې د سیمه ییزو پولیسو پر دوو پوستو شوی دی.
له بل لوي د سیمې اوسېدونکي وايي، وسله والو طالبانو د پولیسو له نظامي وسایطو څخه په ګټنې سره په دغو پوستو برید وکړ.
د پېښې په اړه د ۶۰۴ سرحدي زون ویاند حزل الله خاموش سلام وطندار سره په خبرو کې د برید پخلی وکړ او زیاته کړه، چې د اړیکې پرېکېدو له امله پوره جزیات نه لري.
ده همدا ډول وویل، چې دوی د نظامي شورا د پرېکړې له مخې سنګین، نوزاد او ځېنې نورو سیمو ته سرحدي پولیس لیږلي دي.
د هملند د والي ویاند عمر ځواک د نوزاد نښتې په اړه سلام وطندار ته وویل، چې په سیمه کې نښته شوي ده او دواړو لورو ته درانه تلفات اوښتي دي.
دی وايي، چې د پېښې پلټنې له پاره یې یو پلاوی سیمې ته لیږلی دی.
خو په ورته وخت کې قاري یوسف احمدي چې ځان د وسله والو طالبانو ویاند معرفي کوي ادعا کوي، چې په دغه برید کې یې ۳۱ سرحدي پولیس وژلي دي او وسلې یې له ځانه سره وړي دي.
د طالبانو ویاند همداډول ویلي دي، چې ۵ سرحدي پولیس یې له ځانه سره ژوندي وړي دي.
دغه برید په داسې حال کې تر سره کیږي، چې په دې وروستیو کې یو ځل بیا د هلمند شمالي ولسوالیو کې ناامنې زیاته شوې ده.
