د سمنګان ولایت سيمه ییز چارواکي وايي، چې د دغه ولایت پخوانی رییس د خپلې ښځې پر لور د جنسي تېري کولو په تور د پولیسو له خوا نيول شوی دی.
دغه نجلۍ ۱۸ کلنه ده او د بل پلار نه پاتې ده، د دې مور څو کاله وړاندې د سمنګان د محکمې پخواني رییس سره واده کړی و.
د دغو چارواکو په وينا د قاضي نوم تورګل دی او د شاوخوا ۳ کلونو راهیسې پر خپل لور جنسي تېری کوي، چې اوس یو ۳ کلن ماشوم هم لري.
همدارنګه د راپورونو پر بنسټ د دغې نجلۍ په خیټه کې يو ۶ میاشتينی ماشوم هم شته.
د سمنګان ولایت د قومندانۍ ویاند منير احمد رحيمي سلام وطندار ته وویل، چې د قاضي تور ګل مېرمن دوی ته شکایت کړی و او د هغې د شکایت پر بنسټ يې نوموړی نن یکشنبه( سپټمبر ۲۱) نيولی دی.
له بل لوري بیا د سمنګان ولايتي شورا غړی محمد هاشم تورګل وايي، چې دغه نجلۍ له کوره تښتېدلې او وروسته يې بیا د سمنګان پولیسو ته شکایت کړی.
قاضي تورګل، چې له دې وړاندې د سمنګان د محکمې رییس و، خپله دغه ناسکه لور بامیان ته وړې او هلته يې پرې جنسي تېری کړی.
دغه ۱۳ کلنه نجلۍ اوسمهال د سمنګان په ولايت کې اوسيږي او د عدلي او قضايي ارګانونو څخه غواړي، چې پلندر يې باید په اشد مجازات محکوم شي.
په فاریاب کې د يوې پېغلې نجلۍ ځان وژنه
د یو بل خبر له مخې د فاریاب ولایت پښتون کوټ ولسوالۍ په امام صاحب سيمه کې یوې پېغلې نجلۍ ځان په دار ځړولې.
د پښتون کوټ ولسوالۍ سرپرست عبدالقدير قادري سلام وطندار ته وویل، چې ۲۰ کلنه ګلالۍ نن مخکې له ماسپښينه ځان وژنه کړې.
قادري زیاتوي، چې ګلالۍ د پښتون کوټ په " چماق" سيمه کې د يو هلک سره کوژدن شوې وه او نامزد يې بله ښځه هم درلوده.
هغه د دغې ځان وژنې عمده علت کورنۍ تاوتريخوالی بولي او وايي، چې امنيتي ځواکونه د هغې د وژنې د لامل په اړه څېړنې پېل کړې دي.
د فاریاب ولایت د روغتون مسوولينو هم د ګلالۍ د وژنې تایید کوي او وايي، چې د ګلالۍ په نوم يو جسد له دوی سره شته.
د اسدالله په نوم د ګلالۍ ماما وايي، چې هغې د ميرګي مرض او د خپلې نامزد په خاطر، چې دویمه ښځه لري ځان وژنه کړې.
په فاریاب کې د بشري حقونو د ولايتي دفتر مشر سېد حفيظ الله فطرت وايي، د روان کال راهیسې دا پنځم ځل دی، چې پېغلې ځان وژنه کوي.
څو ورځې وړاندې يوې بلې پېغلې د فارياب ولایت په خواجه سبز پوش سيمه کې په "چره ییز" ډوله ټوپک ځان ووژلو.
