چين ویلي، چې دوی د افغان حکومت او وسله والو طالبانو ترمنځ د خبرو اترو په برخه کې مرستې ته پوره چمتو دي.
د ياد هېواد د بهرنيو چارو وزارت زیاته کړې، چې چين تل د یو باثباته افغانستان ملاتړ کړی او اوس هم د وسله والو طالبانو او افغان حکومت ترمنځ د خبرو اترو په برخه کې مرسته کولی شي.
د چين د بهرنيو چارو وزارت د افغان حکومت او وسله والو طالبانو ترمنځ د خبرو اترو په برخه کې د پاکستان د رول ستاینه هم کړې.
د ياد هېواد د بهرنيو چارو وزارت ويلي، چې په افغانستان کې د سولې راوستو له پاره خبرې اترې تر ټولو غوره لاره ده.
دا په داسې حال کې ده، چې د افغان حکومتي مشرانو او وسله والو طالبانو ترمنځ د لومړي ځل له پاره د پاکستان په مري ښار کې مخامخ خبرې اترې وشوې هغه مهال د خبرو اترو د دویم پړاو له پاره هم د تېر جولای میاشت وروستۍ نېټه ټاکل شوې وه، خو کله چې د طالبانو مشر ملاعمر د مړينې خبر خپور شو، نو طالبانو د دویم ځل خبرو اترو له پاره د رد ځواب ورکړ.
له څو ورځو ځنډ وروسته د طالبانو ځای ناستي ملااختر منصور خپلو جنګیالیو ته امر وکړ، چې باید په افغانستان کې خپلو جګړو ته دوام ورکړي.
د دغه اعلان سره سم د افغانستان په بېلابېلو سيمو په ځانګړي ډول کابل ښار کې بمي چاودنې او ځانمرګو بريدونو زور واخیست.
د شاه شهید له برید وروسته، چې پکې ۲۰ تنه ملکي وګړي ووژل شول او شاوخوا ۴۰۰ تنه نور ټپیان شول له پاکستان سره د افغان دولت ترمنځ روابط په بې ساري توګه ترینګلې شوې.
افغان ولسمشر اعلان وکړ، چې د پاکستان (ارمي پبلک سکول) باندې بريد د پاکستان له پاره د عطف نقطه وه او د افغانستان له پاره به د شاه شهيد برید د عطف ټکی وي.
هغه وویل، چې د سولې ابتکار به له دې وروسته د افغانانو په لاس کې وي او پاکستان باید د ترهګرو ځاله په خپله خاوره کې په نښه کړي.
هغه په ډېر جديت سره د يوې خبري ناستې پر مهال زیاته کړه، چې افغان حکومت تل پاکستان ته د سولې پېغام استولی، خو هغوی دغه پېغام ته په جنګ ځواب ورکړی.
