د بې پولې ډاکټرانو روغتون یو ډاکټر د نوم نه اخیستلو په شرط سلام وطندار ته وویل، چې تېره ورځ د (جولای په ۱) له ماسپښین وروسته د هېواد ځانګړو ځواکونو په دې روغتون د اسنادو د پلټلو په پلمه برید وکړ.
دغه چاره د بې پولې ډاکټرانو د غوسه راوپاروله او ډاکټرانو د روغتیايي خدمتونو له وړاندې کولو په شا شول او د روغتون دروازه یې وتړله.
له دې وړاندې داسې ویل کېدل، چې ګواکې په دې روغتون کې د طالبانو د ټپيانو درملنه کېږي.
دغه سرچینه وايي، چې ځانکړو ځواکونو د اسنادو په پلټولو کې هیڅ داسې سند پیدا نه کړ، چې په روغتون کې دې د طالبانو د ټپيانو درمنله شوې وي.
راپورونه وايي، چې ځانکړو ځواکونو له پلازمېنې نه د برید حکم ترلاسه کړی و.
خو امنیتي مسولینو لا تر دې دمه په دې اړه څه نه دي ویلي.
دغه روغتون د هېواد په شمال ختیځ کې له مجهزو روغتیايي مرکزونو څخه دی، چې له ۵ کلونو راهیسې په دې ولایت کې روغتیايي فعالیت کوي.
په دې روغتون په ورستیو کلونو کې د کندوز ولایت په ناامنه ولسوالۍ چهار درې کې هم څانګه پرانیستې وه.
په چهاردرې ولسوالۍ کې د افغان امنیتي ځواکونو او طالبانو ترمنځ په نښتو کې د بې پولې ډاکټرانو دغه څانګه به کله د مخالفینو او کله هم د امنیتي ځواکونو په لاس کې وه.
امنیتي ځواکونه په دې باور دي، چې کله د چهار درې ولسوالي د طالبانو په لاس کې وه؛ طالبانو د خپلو ټپیان درملنه په دې روغتون کې کوله.
