۲۴ کلنه زهرا د خپل ورور بدلي ده، ۱۲ کاله زده کړې یې کړي، خو یو موټر چلونکي ته واده شوې ده.
د هغې ورور خپله ښځه د کورني تاوتریخوالي له امله طلاق کړې، خو اوس د زهرا خاوند هم غواړي خپله مېرمن د دې لپاره طلاق کړي، چې بدلي "خور" یې طلاقه شوې ده.
زهرا له سلام وطندار سره په خبرو کې وویل، له کله نه چې واده شوې ده، له هغې ورځې د ژوند تر ترخو سره مخ ده.
نوموړې زياته کړه نه یې غوښتل، چې له بې سواده شخص سره واده وکړي، خو د ژوند ناڅرګندو پرېکړو تر ۱۲ کلونو زده کړو او زحمتونو وروسته له ښاره د لېرې ولسوالۍ بهسودو په یوه زاړه کلي کې واده شوه او له یو بې سواده سړي سره یې د ژوند پيوند ټینګ شو.
زهرا زیاتوي، له وهلو، ټکولو او حتی د کور نه له شړلو وروسته یې خاوند طلاق کړه او درې اولادونه یې ور نه ایسار کړي دي.
هغه وايي، له دومره ظلم وروسته نوموړې د پلار په کور کې د ژوند ترخې شېبې تېروي.
زهرا له ټولو کورنیو وغوښتل، چې خپلې لوڼې په بدل ورنه کړي، ځکه د ژوند په لومړیو کې خواږه، خو وروسته د دواړو کورنيو ترمنځ د يوې عادي موضوع پر سر د خوشحالۍ تار شکيږي.
د مېدان وردګو د ښځو چارو ریاست بیا وایي، چې د پخوا په پرتله د نجونو بدل کم شوی، خو بیا هم په یو شمېر لرو پرتو نا امنه سیمو کې نجونې پرته له دې، چې د دوی نظر واخیستل شي؛ په بدل، بدو، او د پیسو په مقال کې پلورل کیږي.
د ميدان وردګو د ښځو چارو سرپرستې مینا احمدي سلام وطندار ته وویل، زهرا یوه لوستې نجلې وه، خو له یوه بې سواده سړي سره د خپل ورور په بدلي واده شوې ده.
له کوم وخت راهیسې، چې د زهرا ورور خپله مېرمن د یو لړ کورنیو ستونزو له کبله طلاق کړه، نو د دې خاوند هم بې له کومې ستونزې زهرا د وهلو ټکولو او ان له کوره شړلو وروسته یې طلاق اخیستلو ته مجبوره او له خپل خاوند نه جلا شوه.
احمدي وایي، د زهرا رضایت دا نه و، چې له خاوند نه طلاق واخلي، خو خاوند یې دې ته اړ کړې، چې د زهرا ورور یې، خور طلاقه کړې او زهرا دې هم طلاقه شي.
د ميدان وردګو د ښځو چارو ریاست سرپرستې زیاته کړه، چې تر ډېره پورې په دغه ولایت کې د بدلي ودونو له کبله له مېرمنو سره تاوتریخوالي راپيدا کیږي.
د ښځو فعالې فاطمه بیا وایې، د پخوا په پرتله ورځ تر بلې په ميدان وردګو ولایت کې د مېرمنو سره تاوتریخوالی زیاتیږي او یواځېنې علت یې په وردګو کې د ښځونالوستي، کمزوری اقتصاد او ناوړه دودونه دي.
دا زياتوي، چې په دغه مسله کې باید ديني عالمان مرسته وکړي.
د ميدان وردګو سرپرست والي عبدالمجید خوږیاڼي سلام وطندار ته وویل، باید د ښځو چارو ریاست او مدني فعالانو له لارې لسګونه بېلا بېلې پروژې عملي شي، چې له مېرمنو سره د تاوتریخوالي پېښو او ناوړه دودنو کچې راښکته شي.
