بوگون «سه‌شنبه» کابل‌ده شهر و جای قوریش وزیرلیگی، سوو ییتکزیش و کانالیزاسیون ریاستی و ایکی خصوصی شرکت رسمی‌لری آره‌سیده تورت سوو ییتکزیش پروژه شرطنامه‌سی امضاءلندی.
اوشبو پروژه‌لرنی خرجتی 700 میلیون افغانی تأمین ایتیلگن و بو پول دولت بودجه‌سیدن توللنه‌دی. مذکور پروژه‌لر کابل، فاریاب، پکتیا و لوگر ولایت‌لریده تطبیق ایتیله‌دی.
سوو ییتکزیش و کانالیزاسیون شرکتی باشلیغی حمیدالله یلانی‌نینگ ایتیشیچه، فایاب ولایتی‌نینگ سوو ییتکزیش ترماغی 249 میلیون افغانی خرجت کوتره‌دی و 18 آی ده قوریله‌دی و 7 مینگ‌دن آرتیق عایله اوندن فایده‌لنیشی ممکن؛ پکتیا سوو ییتکزیش ترماغی 206 میلیون افغانی خرجت کوتره‌دی و یکونلنگن صورتده، 4500 عایله اوندن فایده‌لنه‌دی؛ شونینگدیک، لوگر ده بیر سوو ییتکزیش ترماق قوریله‌دی و بونینگ خرجتی 82 میلیون افغانی تخمین ایتیلگن و بو پروژه یکونلنگن صورتده، 3 مینگ عایله سوودن فایده‌لنه‌دی و عین حالده، کابل نینگ شاه‌شهید منطقه‌سیده باشقه بیر سوو ییتکزیش ترماق قوریله‌دی.
سوو ییتکزیش و کانالیزاسیون شرکت مسؤوللریگه کوره، حاضرگی سوو کابل شهری‌نینگ یشاوچیلری اوچون ییترلی ایمس دیر و شو یوزه‌دن، شاتوت توغانی مطالعه و تیکشیریلیشی اوچون اعلان گه قوییلگن.
اولرگه کوره، مذکور توغان پروژه‌سینی تطبیق ایتیلیشی 150 میلیون دالر تخمین ایتیلگن و بو پول خلق ارا بانکی تامانیدن توللنه‌دی.
