بیرلشگن ملت‌لر تشکیلاتی نینگ افغانستاندهگی سیاسی وکالتخانه‌سی (یونما) نینگ معلوم قیلیشیچه 2009 ییلدن بیری بوکونگه قدر نا حربی افغانلر تلفاتی سانی هیچ بیر ییلده 2016 ییلگه چه کوپ بولمه‌گن. یونما نینگ ییل‌لیک حساباتیده قید ایتیلیشیچه اوتگن ییلی، جنگ‌لر باعث افغانستان اهالیسی تلفاتی 2015 ییلگه نسبتاً کمیده اوچ فایزگه آشگن. اوشبو حساباتده 2016 ییلی جنگ‌لر طفیلی نابود بولگن و یا هم تن جراحتی آلگن عادی افغانلر سانی اون بیر مینگ و بیش یوز کیشی‌نی تشکیل ایتگن. بو آره ده یره‌دار بولگن سانی 2015 ییلگه کوره آلتی فایزنی تشکیل ایته‌دی.
در واقع دوشنبه کونی (18 دلو) یونما ترقه‌تگن حسابات‌دن معلوم بولیشیچه، 2009 ییلدن بیری افغانستان اهالیسی‌دن ییگیرمه بیش مینگ کیشی جنگلرده هلاک بولگن‌لر. شونینگدیک 45 مینگ کیشی‌دن آشه راق اهالی یره‌لنگن. یونما 2016 ییلده یوز بیرگن تلفاتلر نینگ 61% گه دولت‌گه قرشی اوروشه‌دیگن جنگریلر (اساساً طالب‌لر) و 24% گه دولت‌گه تیگیشلی حربی کوچلر سببچی ایکنینی تأکیدله‌یدی. تلفاتلرنینگ 10% تامانلر ارا بولیب اوتگن جنگلرده یوز بیرگن، اما تلفاتلرنینگ 5% عاملی انیقلنمه‌گن.
حساباتده دولت‌گه قرشی اوروشه‌دیگن جنگری‌لرنی عادی اهالی حیاتی‌گه اهمیت بیرمسدن اولرنینگ یشش جایلری‌ده جنگ قیلیب، تینچ اهالی تلفاتی سانی نینگ آشیشی‌گه باعث بولگن‌لیکلری قید ایتیلگن. یونما شونینگدیک دولت کوچ‌لریگه نسبت بیریلگن 24% اهالی تلفاتی نینگ 20% گه دولت حربی‌لری، ایکی فایزیگه دولت‌گه طرفدار جنگچی‌لر و قالگن ایکی فایزیگه ایسه خلق ارا حربی کوچلر جواب‌گر ایکنینی معلوم قیلگن. حساباتده، اوتگن ییلی دولت کوچ‌لری تامانیدن عادی اهالی‌گه ییتگن تلفاتلر 2015 ییلگه نسبتاً 46% گه آشگن. اوشبو حساباتده دولت حربی‌لری و یا جنگریلر صف‌لریده فعالیت آلیب بارمه گن شخصلرگه عادی اهالی دییلگن.
بیرلشگن ملت‌لر تشکیلاتی نینگ افغانستاندهگی سیاسی وکالتخانه (یونما) مملکت بویلب اوروشلر باعث تلف بوله‌دیگن عادی اهالینی رویخط‌گه آلیش ایشی‌نی 2009 ییلده باشلتگن ایدی. مذکور تشکیلات نینگ 2016 ییلی نشر ایتگن ینگی حساباتیده دولت‌گه قرشی جنگ قیله‌دیگن گروه‌لر تامانیدن عمل‌گه آشیریلگن انتحاری هجوم‌لر و چیگل حمله‌لر عادی اهالی آره‌سیده تلفاتلر سانینی آشیرگنی تاکیدلنه‌دی. بیرلشگن ملت‌لر تشکیلاتی امنیت کینگشی نینگ 2276) 2016 رقملی قطعنامه‌سی اساسیده قره مه قرشی تامانلرجنگ‌ده نا حربی آدملر حقلری‌گه حرمت کورستیشی لازم دییله‌دی.
یونما افغانستان‌ده جنگلرده اشتراک ایته‌دیگن تامانلرنی ایکی اساسی گروه یعنی دولت طرفدارلری همده دولت‌گه قرشی تامانلرگه بوله‌دی. دولت‌گه طرفدار حربی‌لر دولت نینگ حربی کوچ‌لری و خلق ارا حربی کوچلرنی اوز ایچیگه آله‌دی. دولت‌گه مخالف کوچلر ایسه حکومت و خلق ارا حربی‌لرگه قرشی جنگ قیله‌دیگن برچه قوراللی گروه‌لردن عبارت.
اوشبو حساباتده دولت‌گه قرشی جنگریلر طالب‌لر، حقانی ترماغی، اسلامی حزب، داعش، اوزبیکستان اسلامی حرکتی، اسلامی جهاد بیرلشمه‌سی، لشکر طیبه، جیش محمد و باشقه گروه‌لرنی اوز ایچیگه آله‌دی. مذکور گروه‌لرنی افغانستان‌ده دولت‌گه قرشی هجوم‌لرده فعال حصه قوشه یاتگن‌لیکلری ایتیله‌دی.
یونوما نینگ سونگی حساباتیده 2016 ییلدوامیده جنگری گروه‌لرنی اته‌یلب عادی اهالی‌گه هجوم اویوشتیرگن‌لیکلری تاکیدلنه‌دی. بیرلشگن ملت‌لر تشکیلاتی عادی اهالی، قضا ارگانلری رسمی‌لری، دولت نینگ نا حربی ایشچیلری، ایلچی‌لیکلر، ییتکرمه (میدیا) لر، نا حکومت اداره‌لر، دینی آزچیلیک‌لر، گه هجوم قیلیش‌نی خلق ارا قانونلرگه کوره: "اوروش جنایتی" دییدی.
حساباتده ایتیلیشیچه طالب‌لر تامانی 2016 ییل دوامیده کمیده 225 واقعه مسوولیتی‌نی اوز بوینی‌گه آلگن. مذکور حادثه‌لر ده کمیده 358 کیشی عادی اهالی قربان بولگن، باشقه 1106 کیشی تن جراحتی آلگن. اوتگن ییلی عادی اهالی‌گه قیلگن توغریدن توغری 82 حمله ده نابود بولگن‌لر سانی 119 کیشی همده یره‌دار بولگن‌لر سانی ایسه 345 کیشی‌نی تشکیل ایته‌دی دییله‌دی یونما حساباتیده.
حساباتده شونینگدیک اوتگن ییلی جوزا آیی نینگ 30 کونی کابل شهریده کانادا ایلچی خانه‌سی نینگ نیپال‌لیک ایشچیلریگه قیلینگن هجوم‌نی انه شو هجوملردن بولگنی قید ایتیلگن. یونما داعش گروهی‌نی 2016 ییلده افغانستان بویلب اوز حمله‌لری میزانی‌نی آشیرگنی‌نی ایته‌دی. حساباتده 2016 ییلی داعش مسوولیتی‌نی اوز ذمه‌سیگه آلگن حمله‌لرده 899 کیشی عادی اهالی قتل ایتیلگن باشقه 209 کیشی تن جراحتی آلگن. بیرلشگن ملت‌لر تشکیلاتی افغانستان ایچکریسیده داعش حمله‌لری آشگنی باره‌سیده جدی خواطر بیلدیرگن.
بیرلشگن ملت‌لر تشکیلاتی نینگ افغانستاندهگی سیاسی وکالتخانه‌سی بیرگینه کابل شهریده شیعه‌لرگه قرشی داعش هجومی نتیجه‌سیده 164 کیشی هلاک بولگنی و باشقه 579 کیشی یره‌دار بولگنی‌نی ایته‌دی. یونما کابل نینگ دهمزنگ منطقه‌سیده اوتکزیلگن ناراضی‌لیک نمایشی‌ده همده کارته سخی زیارتی‌ده اویوشتیریلگن هجوم‌لرنی داعش جنگلری‌لری ایشی ایکنینی ایته‌دی.
بیرلشگن ملت‌لر تشکیلاتی بیر نیچه دیر که افغانستان‌ده جنگ قیله‌دیگن قره مه قرشی تامانلرنی یوز بیره‌دیگن جنگلرده گناه سیز اهالی حیاتی‌نی اسره شده ضروری چاره تدبیرلر کوریشلرینی سوره‌ب کیلماقده. اما بوکونگه قدر مذکور تامانلر بیرلشگن ملت‌لر تشکیلاتی نینگ ایستک‌لرینی انابت‌گه آلمه‌گن. اوشبو تشکیلات هم عادی اهالی حقلرینی ایاق آستی قیله‌دیگن‌لرگه لازم تضییق‌لر اوتکزیش اوچون عملی قدم‌لر تشله مه گن و بو آره‌ده حمایه سیز عادی اهالی همان قربان بولماقده‌لر.
