هرات ولایتی‌نینگ محلی رسمیلری، هرات‌نینگ «جبریل» منطقه‌سیده‌گی مکتب‌لردن بیری یقینی‌ده ترقه‌تیلگن گاز نتیجه‌سیده مذکور مکتب‌نینگ 131 اوقووچیسی زهرلنگن‌لیگینی ایتگن‌لر. مذکور حادثه اوتگن کون (دوشنبه) «حبیب‌المصطفی» مکتبی‌نینگ اوقووچیلری صنف‌گه کیره‌دیگن بیر چاغده یوز بیرگن.
حادثه‌نی تصدیق‌له‌گن هرات ساغلیق‌نی سقلش اداره‌سی‌نینگ مسؤوللری، اوقووچیلر گاز ترقه‌تیلگن‌لیگی سبب زهرلنگن‌لیکلرینی ایتگن، اما رسمیلر اوقووچیلر احوالی یخشی بولگن‌لیگیدن ایشانچ بیرگن‌لر.
هرات شفاخانه‌سی‌نینگ سوزلاووچی‌سی محمد رفیق شیرزی‌نینگ سوزلریگه قره‌گنده، زهرلنگن برچه اوقووچیلر 12 دن 15 یاشگچه بولگن قیزلردن عبارت.
قویاش جاری ییل باشلنگن‌دن بیری ایکّنیچی مرته هرات ولایت بعضی مکتبلری‌نینگ اوقووچیلری تورلی ماده‌لر بیلن زهرلنتیریله دیلر. شونینگ‌دیک بوندن اوچ آی آلدین هم هرات شهری‌نینگ «نوآباد» منطقه‌سیده‌گی مکتب‌نینگ 100 اوقووچیسی شورنخود ییب زهرلنگن ایدیلر.
هرات پولیس رسمیلری، واقعه‌ده قولی بارلیک‌ده گمان قیلینیب هیچ بیر کیمسه اوشلنمه‌گن لیگینی بیلدیریگن، بیراق حادثه یاروتیلیب واقعه عامل‌لری قول‌گه آلینیشی اوچون تیرگاوو باشلگن.
زهرلنگن‌دن سونگ ساغلیگی یخشی‌لنگن ایریم اوقووچیلر بیر قسم یامان هیدنی ایسلش بیلن باش‌لری ایله‌نیب اوزلریدن کیتگن‌لیکلرینی حکایه قیلگن‌لر. شوکبی عینی گواه‌لر، مذکور ایس مکتب‌نینگ اطرافیده ترقه‌تیلگن‌لیگی سبب تاثیری اونچه‌لیک بولمه‌گن‌لیگنی تیل‌گه آلگن‌لر.
افغانستان‌ده قیز اوقووچی‌لرنی زهرلنتیریش یالغوز هرات ولایتی‌گه چیکله‌نیب قالمه‌گن. اوتگن ییل‌لرده هم مینگلب اوقووچی کابل قوشیمچه مملکت‌نینگ ایریم ولایت‌لریده نا معلوم دلیل‌لر سبب زهرلنگن ایدیلر. لیکن، افغانستان حکومتی هنوزگچه هم بونده‌ی حادثه‌لر عامللرنی تَنیش‌گه موفق بولمه‌گن.
