د سرپُل ولایت سیمهییز چارواکي وايي، چې پرون ناوخته مهال پهدې ولایت کې یو سړي د لفظي شخړې پر سر خپله ښځه د کُلنګ پهواسطه ووژله.
د سرپُل د ښځو چارو رییسې نسیمې ارزو سلام وطندار ته وویل، دا ښځه زهرا نومېدله، چې ۳۴ کاله عمر یې لرلو او د سرپُل د «چمشهشفاء» سیمې اصلي اوسېدونکې وه.
د سرپُل د ښځو چارو د رییسې پر وینا، چې د زهرا مېړه «نور محمد» له هغې سره له یو څه لفظي شخړې وروسته د زهرا له غېږې ۷ میاشتنی ماشوم اخلي، په ځمکه یې ولي او بیا د هغې سر ته کُلنګ نیسي او تر مرګه یې وهي.
ارزو د دا ډول پېښو په اړه اندېښنه وښوده او زیاته یې کړه، چې د پېښې عامل دې ونیول شي او د قانون منګولو ته دې وسپارل شي.
په ورته وخت کې د ولایت مقام ویاند ذبیحالله اماني هم پېښه تاییدوي؛ وايي، چې تورن شخص له سیمې تښتېدلی دی؛ خو دوی یې د پيدا کولو په هڅه کې دي.
د ارزو په باور، بېوسي، د سواد ټیټه کچه، اجباري او په کمر کې د ودنو کول او د مجازاتو معافیت په سرپُل کې له ښځو سره د تاوتریخوالي اصلي لاملونه دي.
