نن په کابل کې د افغانستان انرژي او اوبو وزارت او د چالیک هولدینګ په نوم ترکي شرکت مسوولانو ترمنځ د ولسمشر محمداشرف غني په حضور کې د برېښنا د ټاپ پروژې تړون لاسلیک شو.
د انرژي او اوبو سرپرست وزیر محمدګل خلمي وایي، د چالیک هولدینګ په نوم ترکي شرکت به پر ټاپ پروژې ۱.۶ میلیارده ډالر پانګونه وکړي.
ټاپ پروژه د ترکمنستان برېښنا افغانستان او پاکستان ته لېږدوي.
پهدې پانګونې کې ترکمنستان او افغانستان کې په دوه سرکیته کې د ۲۰۰۰ مېګاواټه په ظرفیت د ۵۰۰ کیلو ولټه برېښنا مزي غځېدل او په دواړو هېوادو کې د ۵۰۰ کیلو ولټه برېښنا سبسټېشنونو جوړول شامل دي.
افغانستان ته د برېښنا مزي ظرفیت ۱۰۰۰ میګاواټه اټکل شوی چې په ۳ کالو کې به بشپړ او ګټنې ته چمتو شي.
د برېښنا له دې مزي به ۱۰۰۰ میګا واټه پاکستان ته ولېږدول شي او ۱۰۰۰ میګا واټه افغانستان ته او له پاکستانه به ۱۰۰ میلیونه ډالر د ترانزیت حق په توګه ترلاسه شي.
د چالیک هولدینګ شرکت رییس احمد چالیک وایي چې ډېر ژر به د دې پروژې سروې پیل کړي.
