کورنيو چارو وزارت د يوې خبرپاڼې په خپرولو سره ويلي د پولیسو ځانګړو ځواکونو د کابل ښار په اړوند سیمو کې د ترهګرۍ ضد ځینې هدفمند عملیات ترسره کړي چې په ترڅ کې يې یوه ترهګریزه ډله چې پر حسیني عزادارانو یې د برید قصد درلود، نیولې ده.
د خبرپاڼې له مخې یاد عملیات تېره شپه د کابل ښار د پنځمې امنیتي حوزې په اړوند سیمو کې ترسره شوي چې په پایله کې يې د یوې ښځې په ګډون د ترهګرو ۹ کسیزه ډله چې غوښتل یې په کوټېسنګي سیمه کې پر حسیني عزادارانو برید پلان کړي، د چاودېدونکيو توکيو له دوه واسکټونو او شپږ کړۍ بمونو سره یو ځای نیول شوې ده.
خبرپاڼې زياته کړې چې يادو ځواکونو همداراز د کابل ښار د ۱۲مې امنیتي حوزې په اړوند سیمو کې هم د یو لړ عملیاتو په ترڅ کې د ترهګرو یوه پنځه کسیزه ډله نیولې ده.
کورنيو چارو وزارت ويلي چې امنيتي ځواکونو په کابل کې د حسیني عاشورا د ورځو د امنیت ساتنې په موخه ځانګړي امنیتي تدابیر نیولي او هېچاته به اجازه به ور نه کړي چې د يادو مراسمو امنیت مختل کړي.
