د کونړ مسوولانو اعلان کړی چې د ملي امنیت ځواکونو په دغه ولایت کې د لشکر طیبه ډلې درې پاکستاني غړي وژل شوي دي.
د کونړ د والي ویاند عبدالغني مصمم ویلي چې یاد جنګیالي بېګاه د دغه ولایت په اسمار ولسوالي کې وژل شوي دي.
د نوموړي په وینا، د ملي امنیت ځواکونو په دغو عملیاتو کې د لشکر طیبه ډلې دوه نور غړي ټپیان شوي هم دي.
د کونړ د والي ویاند د معلوماتو له مخې، هغه جنګیالي چې وژل شوي او ټپیان دي، ټول پاکستانیان دي.
په دغو عملیاتو کې د یادې ډلې ځینې مهمات هم د امنیتي ځواکونو لاس ته ورغلي دي.
لشکر طیبه، یوه پاکستانۍ ترهګره ډله ده. د دغې ډلې جنګیالي د نورو ترهګرو ډلو له وسلهوالو سره نږدې اړیکه لري او یوه بله تجهیزوي.
لشکر طیبه تر ډېره د سوېلي اسیا هېوادونو، په تېره افغانستان کې فعالیت کوي او له القاعده شبکې او داعش ډلې سره نږدې اړیکه لري.
