بدخشانده کوندهلیک ایشلاوچیلردن بیرقطاری نینگ ایتیشیچه، اولر کوندهلیک ایش تاپیش اوچون مذکور ولایتنینگ محلی ادارهلری مسؤوللریگه رشوت بیرهدیلر.
اولرنینگ ایتیشیچه، ایش یوقلیگی و ایشلاوچی لر کوپلیگی باعث، ایشلاوچیلیک حقوقلریدن یالغیز 20% اوزلریگه و باشقه 80% حکومتی رسمیلرنینگ نصیبی بولهدی.
بدخشانده عادی ایشلاوچیلردن بیری محمدظریف نینگ ایتیشیچه، اوشبو ولایتده کوندهلیک ایشلاوچیلرنینگ اساسی قیینچیلیگی ایش یوقلیگی دیر و اولر کوپینچه کونلر ایش تاپمسدن اویگه قیتهدیلر.
اوشبو ایشلاوچیلرگه کوره، روزگار قینچلیگی و آچ قولیش خطری ایش قولگه کیلتیریش اوچون حکومت ادارهلری و محلی رسمیلردن بیرقطاریگه رشوت بیریش گه مجبور قیلهدی.
اولردن بیرقطاری، معارف و ایکنچلیک وزیرلیگینینگ موادلرینی کیلتیرهدیگن موترلرنینگ وسایل لرینی توشیریش اوچون 80 فایز حقلری نی رسمی لرگه بیریشی نی ایتهدیلر.
بدخشان اشلاوچیلری ملی بیرلشمهسینینگ مسوولی سید سمیع الله رحمانینینگ ایتیشیچه، اوشبو ولایت ایشلاوچیلرینینگ وضعیتی خواطرلنتروچی دیر و محلی حکومت هم ایشلاوچیلرگه قرشی عدالت سیزلیک قیلهدی.
رحمانینینگ ایتیشیچه، بدخشان ولایتیده ایش سیزلیکلر میزانی یوقاری دیر؛ بیراق توسعهیی پروژه لرده انسانی کوچلردن قولهنیلمیدی و اوشبو ولایت ایشلاوچیلرینینگ اورنیده باشقه ولایت لردن ایشلاوچی استخدام بولهدی.
اونینگ کوپیتیریشیچه، باشقه ولایت لردن بدخشان ولایت ده کیلهدیگن حکومت رسمیلری، محلی ایشلاوچیلرنی چیتلنتیریب و اوزی ولایتی ایشلاوچیلری نی استخدام قیلهدی.
عینحالده بدخشان ولایتینینگ اجتماعی ایشلر ریاستی سرپرستی صفی الله اعتمادی، ایشلاوچیلرگه قرشی قیینچلیکلر بولگنی نی تصدیقلب و اوشبو قیینچلیکلر تعیینلنگن کمیتهلر آرقهلی تیکشیریلیب و نتیجهسی بدخشان محلی حکومتی اختیاریگه قویلگن دیدی.
بدخشان اجتماعی ایشلر ادارهسینینگ مسوول لریگه کوره، عادی ایشلاوچیلرگه ایش بولمگنی یانیده 40 فایز تحصیل قیلگن کیشیلر هم ایش سیز دیر.
اجتماعی ایش لر ادارهسینینگ رسمی لریگه کوره، بدخشان ولایتیده ایش قوریش ظرفیتلری کوپ دیر و مرکزی دولت توجه قیلگن حالده محلی منبع لردن قوللهنیش بیلن ایشگه زمینه یرهته آلهدی.
