د افغانستان د کرنې او اوبو لګولو او مالدارۍ وزارت مسوولان وايي، د کورونا ویروس دوره کې د کرنیزو محصولاتو مدیریت لپاره يې د ۱۳.۷ میلیارد افغانيو په بودیجې سره طرحه چمتو کړې ده.
د ياد وزارت مرستیال حشمت الله غفوري یوه خبري ناسته کې وويل، داسې یوه طرحه یې جوړه کړې چې له مخې یې هغه کرنیز محصولات چې د کورونا ویروس له کبله د قرنطین ښکار شوي او بهرنیو هېوادونو ته نه صادرېږي، وساتل شي.
غفوري وايي، د دې محصولاتو د ساتلو مسوولیت لس سلنه بزګر او ۹۰ سلنه هم دولت ته ورګرځي چې په کې د بېړنیو ممیزخونو جوړول، د کرنیزو محصولاتو د زېرمه کولو په پار په بېړني ډول د سړوخونو یا زېرمتونونو جوړول، بڼوالو او بزګرانو ته د مېوو او سبو وچوونکي ماشینونه چمتو کول او د بنسټونو له لوري بزګرانو ته د کرنیزو محصولاتو د پېر قراردادونه وړاندې کول شامل دي.
د نوموړي په وينا، د دې طرحې پلي کېدل یو بېړنی کار دی او له څلور تر شپږو میاشتو پورې پلي کېږي او هغه ولایتونه تر خپل پوښښ لاندې راولي چې تولیدات یې ډېر وي.
د کرنې وزارت مرستیال حشمت الله غفوري زیاته کړه چې د دې طرحې ټوله بودیجه چې ۵۰ سلنه به یې د دې تولیداتو له لارې پوره کېږي ۱۳،۷ میلیارده افغانۍ کېږي.
