.jpg)
د کندوز امنیتي مسوولان وايي، چې پهدې ولایت کې یې پهداسې مهال ۳ طالبان نیولي، چې امنیتي پوستو ته د ځمکې له لارې د تونل پر کېندلو بوخت وو. وايي، چې دا درېواړه کسان وروڼه دي.
د کندوز په امام ولسوالۍ کې د ملي اردو د اولې لوا د درېیم کنډک د همغږۍ امر بشیر احمد فدايي سلام وطندار ته وویل، چې دا ۳ تنه یې د دې ولسوالۍ په اسماعیل کلي کې داسې وخت نیولي، چې د ۱۵۰ مترو او ۶۰ مترو په اوږدوالي یې دوه تونله کیندلي وو او امنیتي پوستو ته د نږدې کېدو په حال کې وو.
.jpg)
د هغه پر وینا، دغو کسانو د یو کور له دننه له یوې اوونۍ راهیسې د دغو تونلونو په کيندلو پیل کړی و.
په ورته وخت کې د امام ولسوال امامالدین قریشي د دې خبر په تایید سره وايي، چې طالبان د تونلو د کیندلو ترڅنګ په دې ولسوالۍ کې د پرمختګ په حال کې دي او هره ورځ له ۱۰ نیولې تر ۳۰ مترو پورې امنیتي پوستو ته رامخکې کېږي.
.jpg)
طالبانو تېر کال هم د دې ولایت د دشتارچي ولسوالۍ په پلمومن سیمه کې د یو تونل له لارې په یوې امنیتي پوستې برید کړی و او د ملي اردو نږدې ۱۰ سرتېرې یې وژلي وو.
