د کابل ښار په منډيي کې شاوخوا ۲۰۰ دوکانونه وسوځېدل

د وروستيو راپورونو له مخې د پلازمينې کابل ښار په منډيي سيمه کې د اور لګېدنې له امله شاوخوا۲۰۰ دوکانونو ته زیان رسېدلی دی.

نن شنبه (ډسمبر۵مه) د کابل ښار منډيي سيمې په زرداد سرای کې، چې په هغه کې زیات د بوټانو مغازې دي اور ولګېد.

د دغو مغازو ځينو دوکاندارانو سلام وطندار ته وویل، چې په دغه اور لګېدنه کې د دوی د هټيو په ګډون په سلګونه زره ډالره پانګه هم سوځېدلې ده.

د زرداد سرای یو تن هټيوال الله محمد میرزايي وايي، چې په دغه اور لګېدنه کې يوازې د ده ۷ ګدامونه او ۲ دوکانونه سوځېدلي دي.

د هغه په خبره يوازې دی و کولی شو، چې د خپل دوکان کتابچه وباسي او بس.

خو د کابل امنيه قومندان جنرال عبدالرحمان رحيمي رسنيو ته وویل، چې په دغه اور لګېدنه کې یوازې ۸۰ مغازې سوځېدلي او اور لګېدنه هم د برق د شارټي له امله رامنځ ته شوې وه.

هغه وايي، په حاجي زرداد سرای کې، چې د څپليو، بوټانو، سپنجي توکو په ګډون کيمیاوي مواد هم خرڅيږي په کې د اور لګېدنې له کبله لمبې زیاتې شوي او نورو دوکانونو ته يې هم سرایت کړی دی.

د هغه په خبره د زرداد سرای په ګډون د هغه ترڅنګ د حبیب الله په نوم ګدام هم سوځېدلی دی.

د زرداد سرای څوکي دار محمد اسحاق هم وايي، چې د برق د شارټي له وجې دغه اور لګېدنه رامنځ ته شوې.

د ویلو ده، چې دا څوم ځل دی، چې د پلازمينې کابل ښار د منډيي بېلابېلې سيمې اور اخلي.

له دې وړاندې د رختو د پلورنځي یو سرای اور اخیستی وو، چې له امله يې هټيوالو ته درانه مالي زيانونه اوښتي وو.