کندوز ولایتی‌نینگ محلی بلند مرتبه‌لی رسمی‌لری، چهار دره ولسوال‌لیگی‌ده افغان ملی کوچلری همده طالب‌لر اورته‌سیده وقفه‌یی شکل‌ده اوروش جریانی بارلیگینی ایتگن‌لر و امنیتی مسؤوللر بو باره‌ده عاموی اخبارات واسطه‌لریگه انیق جواب بیرمه‌گن.
کندوز ولایت کینگشی‌نینگ اورین باسری امرالدین ولی‌نینگ سلام‌وطندارگه ایتیشیچه، بو ولسوال‌لیک‌ده هر کون ملی کوچلر بیلن جنگری‌لر اورته‌سیده اوروش دوامی بار. اما، امنیتی مسؤوللر اوروش باره‌سیده مدیاگه توغری معلومات بیرمیدی.
عین حالده، بوندن بیر هفته آلدین، ولایت رسمی‌لری مذکور ولسوال‌لیک جنگری‌لر تصروفیدن آزاد ایتیلگن‌لیگینی ایتگن ایدیلر.
ایچکی ایشلر زویرلیگی‌نینگ سوزلاووچیسی صدیق صدیقی‌نینگ بیلدیریشیچه، ولسوال‌لیک حکومت اداره‌سی آستیگه اوتگن، طالب‌لر بو ولسوال‌لیک‌دن چیقاریلگن.
بوندن بیر هفته آلدین آغیر اوروش گواهی بولگن کندوزنینگ چهار دره ولسوال‌لیگی نهایت‌ده جنگری‌لر تصروفیگه اوتگن ایدی و مذکور گروه اوروش جریانیده افغان ملی کوچلری آغیر جانی تلفات ییتکزگن‌لیک‌لرینی ادعا قیلگن ایدی.
اوز نامی فاش ایتیلیشینی ایستمه‌گن کندوز امنیتی بیر مسؤولی‌نینگ سلام‌وطندارگه بیلدیریشیچه، بوگون ایرته‌لب‌دن باشلب ملی کوچلر عصیانچی‌لرنی نابود قیلیش اوچون هوا و ییردن عملیات باشله‌گن‌لر. اما، هنوزگچه ملی کوچلرنینگ قنچه‌لیک آلغه بارگنی باره‌سیده خبر بیریلمه‌گن.
ایتیلیشیچه، چهار دره ولسوال‌لیگی‌ده‌گی نا برقرارلیک‌لر باعث 200دن آرتیق خانه‌دان اوز یشش اویلرینی ترک قیلیشگه مجبور بولگن.
اوز ییش اویلردن آواره بولگن‌لرنینگ کوپچیلیگی یتیم، نهر صوفی و دوبندی قیشلاقلری‌نینگ اهالیسی‌دن عبارت ایکن‌لیگی ایتیله‌دی.
جاری ییل باشله‌نیشی بیلن قوراللی طالب‌لر فاریاب، بدخشان، نورستان، تخار و هلمند ولایت‌لریده اوز هجوملرینی شددت لشتیرگن.
اوتگن هفته دوشنبه کونی افغانستان ملی مجلسی اوشبو گروه آرقه‌لی هجوم آستیگه آلنیشی ینگی موضوع‌لر جمله‌سیدن، مذکور هجوم نتیجه‌سیده ایکی تینچ اهالی قربان بولیب، کمیده 31 کیشی یره‌لنگن ایدی.
