افغانستان برقینی تأمینلیدیگن برشنا شرکتی رسمیلرینینگ ایتیشیچه، افغانی پول برابریده دالر قیمتی یوقاری کیتگنی باعث، برق نرخینی کوپهیتیرگن.
برشنا عمومی ریاستی سوزلاوچیسی وحید توحیدینینگ سلاموطندارگه ایتیشیچه، اوشبو شرکت قوشنی مملکتلر برقینی دالرگه ساتیب آلهدی، دالر قیمتی کوپهیگنی سبب، برق نرخی هم کوپهیتیریلگن.
جناب توحیدینینگ ایتیشیچه، برشنا شرکتی جاری ییل آلتی آی باشیده دالر قیمتی افغانی پول برابریده کوپهیگنی باعث، 7 میلیون دالر زیان کورگن. اونگه کوره، برشنا ییلده برق ساتیب آلیش اوچون قوشنی مملکتلرگه 200 میلیون دالر تولهیدی، دالر قیمتی کوپهیگنی باعث، بو پولنی توله آلمهیدی.
برشنا عمومی ریاستی سوزلاوچیسیگه کوره، جاری ییل قوس آییدن کیین، هر بیر کیلووات برق نرخی 5 پول کوپهییشی ممکن.
نیچه کون آلدین هرات ولایتی برشنا شرکتی تامانیدن، مذکور ولایت یشاوچیلریگه ترقهتیلگن ورقلرگه کیلیشیچه، سونگی دور برق خرجتی ترقهتیش ورقلریده، افغانی پول برابریده تشقی پوللر قیمتی یوقاری کیتگنی باعث، برق نرخی کوپهییشی ممکن.
بیراق هرات یشاوچیلریدن بیرقطاری، سونگی آیلرده برق بهاسی کوپهییشینی حکومت تامانیدن «باج آلیش» بیلیب ایتیشیچه، حاضرگی شرایطده خلق ایشسیزلیک و قشاقلیککه حیات کیچیرهدی، برق قیمتی کوتریلیشینی قبول قیلهآلمهیدی.
اوشبو یشاوچیلرنینگ ایتیشیچه، برق بهاسی تشقی پوللر قیمتی اساسیده تدبیرلنگن صورتده، دولت ایشچیلرینینگ آیلیکلری «دالر» اساسیده توللنیشی لازم و بو طریقدن اولر برق پولینی تولهآلهدی.
شونینگدیک هرات ولایتی برشنا شرکتی رسمیلرینینگ ایتیشیچه، افغانی پول برابریده تشقی پوللر قیمتی کوپهیگنی باعث، اوشبو شرکت نیچه میلیون دالر زیان کورگن و بو زیاننی جبران قیلیش اوچون، برشنا عمومی ریاستی برق نرخی کوپهیتیریلیشی خصوصیده قرار قیلگن.
برشنا شرکتی انچه پیت آلدین هرات ولایتیده، بیر کیلووات برق نرخینی 3.2 افغانیدن 5.2 افغانیگه کوترگن ایدی. برشنا شرکتینینگ، بو ایشی هرات یشاوچیلرینینگ قرشی لیگیگه روپهره بولدی و نتیجهده بیر کیلووات برق نرخی 4 افغانی تعیین ایتیلدی.
هرات ولایتی برشنا شرکتی حاضرگی کونلرده 120 میگاوات برق ایراندن و باشقه 20 میگاوات برقنی ترکمنستاندن آلیب کیلهدی.
