د کندهار یو شمېر ولسوالیو، زابل، روزګان، هلمند، فراه، نیمروز او ځېنو نورو ولایتونو کې د جګړو او نا امنیو له امله، سلګونه بېځایه شوې کورنۍ کندهار ښار ته کډه شوي چې د سختو شرایطو لاندې ژوند کوي.
یو شمېر دغه بېځایه شوې کورنۍ وايي، د ژمي په را رسېدو سره د کار کولو زمینه ورته تنګه شوې او ستونزې یې نورې هم زیاتې شوېدي.
دوی له اړوندو ادارو غواړي، د خوړو او سرپناه برابرولو کې ورسره همکاري وکړي.
دغه بېځایه شوې کورنۍ همدارنګه وايي، دولت دې ورته خپلو سیمو کې امنیت ټینګ کړي یا دې هم ورته د ژوند امکانات برابر کړي.
هاخوا د کندهار مرستیال والي حاجي اغالالی دستګیري د یادو بېځایه شویو کډوالو ستونزې مني؛ خو زیاتوي چې د دې کورنیو غوښتنو ته به لاسرسی وکړي.
د ده په وینا، ولایتي اداره بېځایه شویو کډوالو ته ځانګړې پام کوي او پهدې اړه د کډوالو چارو ریاست، له طبیعي سره د مبارزې ریاست او نورې نړۍوالي موسېسې په ټولو ناحیو او ولسوالیو کي د اړمن کسانو تر دقیقې پلټني وروسته هرې کورنۍ ته د خوراکي توکیو ترڅنګ ژمنۍ تودې جامې او ان د کور بېلابېلا سامانونه ورکوي.
د ښاغلي دستګیري په خبره، تېره میاشت يې هم د همکارو موسېسو لهخوا تر ۵ سوو زیاتو بېځایه شویو او بېوزلو کورنیو ته خوراکي او غیرخوراکي توکي وېشلي دي.
سره لهدې چې د کندهار مرستیال والي وايي، د دغو بېځایه شویو کورنیو اړتیاوو ته به لاسرسی وشي؛ خو د یو شمېر بېځایه شویو کورنیو په خبره، څو ځلې یې د کندهار ځايي ادارې ته غوښتنلیکونه وړاندې کړي؛ خو پایله یې نهده ورکړې.
