د هلمند ولایت د پوهنې رياست مسولينو له رسنیو سره د خبرو پر مهال وویل، چې سږ کال د پوهنې وزرات له خوا د دغه ولایت پوهنې ریاست ته کمه بودیجه ورکړل شوې ده.
د دوی پر وینا، ښايي د دغې کمې بودیجې له امله ځېنې ښوونځي و تړل شي.
د پوهنې ریاست مسولین وايي، چې دوی ته د تېر کال په پرتله سږ کال ۶۴ میلیونه افغانۍ کمه بودیجه ورکړل شوې ده.
د هلمند د پوهنې ریيس عبدالمتين جعفر سلام وطندار ته وویل، چې په تېر يو کال کې يې ۱۰۰ ښوونځي، چې د بېلابېلو لاملونو له امله تړل شوي وو؛ پرانیستي دي.
نوموړی د ۱۸ نوو ښوونځیو د جوړېدلو خبره هم وکوي، وايي، چې د بودیجې د کموالي له امله د پوهنې بهیر د ټکني کېدو په حال کې دی.
دا په داسې حال کې ده، چې تېر کال د پوهنې وزارت له لوري دغه ریاست ته ۳۴۷ میلیونه ۹ لکه او ۷۶ زره بودیجه ور کړل شوې وه، خو سږکال ورته ۲۸۳ میلیونه ۹ لکه او ۹۸ زره بودیجه ور کړل شې ده.
د بودیجې دغه شمېر ښيي، چې سږ کال د هلمند ولایت پوهنې ریاست ته د تېر کال په پرتله نېږدې ۶۴ میلیونه افغانۍ کمه بودیجه ورکړل شوې ده.
له بل لوري د دغه ولایت مدني فعالان وايي، که مرکزي حکومت دې برخې ته پاملرنه ونه کړې؛ د پوهنې بهیر به له ستونزه سره مخ شي.
مدني فعال اغا محمد قریشي وايي، چې د خپلو مدني حرکتونو له لارې به حکومت دې برخې ته متوجه کړي او د بودیجې د کمښت ستونزه به پرې حل کړي.
د هلمند یو بل مدني فعال عادل سلام وطندار ته وویل، چې د پوهنې وزارت باید د دغه ولایت لاسته راوړنې وساتې، نه دا چې پر کارونو یې خاورې واړوي.
په هملند ولایت د پوهنې ریاست د چارواکو له خوا په داسې حل کې د بودیجې د کموالي له امله د ښوونځیو د تړل کېدلو خبرې کیږي، چې په دې ولایت کې لا هم د ۱۰۰ ښوونځیو دروازې تړل شوې دي.
