کرکټ بورډ د کندوز ولایت جنګ ځپلو له پاره د مرستو راټولو په موخه د کرکټ ۲۰ اوریزه سیالۍ پلان کړې ده.
د افغانستان کرکټ بورډ له خوا سلام وطندار راډیو ته په رالېږل شوې خبرپاڼه کې ویل شوي، پلان شوې ۲۰ اوریزه کرکټ سیالۍ به د راتلونکې جمعې په ورځ د اکتوبر په ۲۱ مه نېټه ترسره شي.
خبرپاڼه لیکي، د دې سیالۍ موخه د کندوز جنګ ځپلو له پاره د مرستې راټول دي چې په دې سیالۍ کې به د کرکټ ملي لوبډلې مشهور لوبغاړي ولوبیږي.
د کرکټ بورډ خبرپاڼه زیاتوي سیالۍ به د کابل په الکوزي – کرکټ نړیوال لوبغالي کی ترسره شي او ترلاسه شوې پیسې به د کندوز ولایت وروستیو جنګونو له کبله په بې ځایه شویو کډوالو د مرستې په توګه ووېشل شي.
د کرکټ بورډ اجرایوي مشر شفیق الله ستانکزي د افغانستان له ملي سوداګرو او کرکټ مینه والو غوښتي چې د سیالۍ په مالي ملاتړ او ټکټ اخیستلو کې د کندوز له جنګ ځپلو او بې ځایه شویو سره مرسته وکړي.
افغان کرکټ بورډ تېر کال هم د اکتوبر میاشتې په ۱۵ مه نېټه د کندوز ولایت د جنګ ځپلو او بې ځایه شویو کډوالو سره د مرستې په موخه د کرکټ سیالۍ جوړه کړې وه.
