کاپیسا ولایتی‌نینگ رسانه‌چیلری معلومات‌لرگه قول تاپیش و ولایت رسانه‌لری مالی قیینچی‌لیگی باره‌سیده خواطر بیلدیریب، مذکور ولایت‌ده یایین بیره‌دیگن ایریم مدیا اوز فعالیتی‌نی توخته‌تیشی حقیده خبر بیرگن‌لر.
اوشبو رسانه‌لر ولایت مدیاسی وضعیتی‌گه اعتبار قره‌تیلمه‌گن حالده، ولایت‌ده نشرات بیره‌دیگن قطار رسانه‌لرنینگ فعالیتی توخته‌لیب قالیشی ممکن دیگن‌لر.
جاری ییل بهار آیی‌دن بیری نشراتی توخته‌لیب قالگن چاپی رسانه‌لردن بیری‌نینگ مدیر مسؤولی اسدالله شیوا منصوری‌نینگ سلام‌وطندارگه بیلدیریشیچه، کاپیسا ولایتی‌ده مدیا قرشی‌سیده تورگن ییریک معما تبلیغات و بودجه یوق‌لیگی دیر. شونینگ‌دیک جناب منصوری، خبرچی‌لرنینگ جانی خوفسیزلیگی و معلومات‌لرگه قول تاپیش ممکن بولمه‌گنی ولایت خبرچیلری‌نینگ باشقه بیر معمالریدن سنله‌دی دیگن.
کاپیساده‌گی چاپی رسانه‌لردن باشقه بیری‌نینگ مسؤولی آقابچه شهیداگه کوره، نشریه‌سی بیش ییل‌دن کیین مالی قیینچی‌لیک باعث نشرات‌دن قالگن. جناب شهیدا، عاموی اخبارات واسطه‌لرینی حمایت قیلیووچی تشکیلات‌لردن محلی رسانه‌لرنی حمایت قیلیش‌نی سوره‌گن.
کاپیسا خبرچیلریدن بیری مرتضی خاشی، اوتگن نیچه آی جریانیده ولایت بویلب نیچه چاپی رسانه فعالیتی توخته‌لیب قالگن دیگن. اونگه کوره، رسانه‌لر فعالیتی توخته‌ب قالیشی‌نینگ بیرینچی عاملی تشقی یاردم‌لر کمه‌یشی همده بو ساحه‌ده تبلیغات بولمه‌گن لیگیدین کیلیب چیقه‌دی.
کاپیساده قطار تینگلنه‌دیگن و چاپی رسانه‌لر فعالیت قیله‌دی؛ اما جناب خاشی مذکور ولایت‌ده رسانه‌لرنی حمایت قیله‌دیگن معین اداره بولمه‌گن لیگینی‌نی بیلدیرگن.
اوشبو خبرچی ولایت اخبارات و مدنیت ریاستی‌دن محلی رسانه‌لر کوچله‌نیشی اوچون معین لایحه نظرده توتیش‌نی طلب قیلگن.
ایریم گزارش‌لرده حاضرگی کونده کاپیسا ولایتی‌ده ملی رادیو تلویزیون‌دن تشقری اوچ خصوصی تلویزیون، سکیز محلی رادیو و آلتی چاپی نشریه فعالیت ایته‌دی.
