د روان ۱۳۹۹ کال د کانکور ازموینې د پایلو له اعلانېدو سره وروسته، اوس په دې ازموینه کې د لوړو نومرو اخیستونکي د ښوونځیو د کتابونو د زوړوالي په اړه شکایت کوي.
د دوی په وینا، د څو کلونو په تېرېدو سره اوس هم په ښوونځیو کې ښوونیز نصاب نه دی بدل شوی.
د سږ کال په کانکور ازموینه کې د لوړو درجو لرونکي وايي، که څه هم د پوهنې وزارت مسوولان تل د ښوونیز نصاب پر سمون او بدلون ټینګار کوي، خو دغه کار تر اوسه نه دی عملي شوی.
په کانکور ازموینه کې د لوړې درجې اخیستونکي نصیحه، توریالی او شمسیه وايي، د هېواد ښوونیز نصاب له ۱۳۹۰ او ۱۳۸۹ راهیسې پر خپل ځای دی.
د دوی په وینا، پوهنې وزارت باید پر ښوونیز نصاب چې د پوهنې او لوړو زدهکړو په برخه کې د بنسټ په توګه یادېږي، نوی او د وخت له غوښتنو سره سم جوړ کړي.
خو د پوهنې وزارت ویانده نوریه نزهت وايي، د ښوونځیو د ښوونیز نصاب په اړه د بدلون چوکاټ چمتو شوی او لا هم د ښوونیز نصاب پر سمون او بدلون کار روان دی.
هغه وايي، تر اوسه یې د لومړي، دویم او درېیم ټولګیو نصاب نوی کړی او د نورو ټولګیو پر نصاب هم کار روان دی.
زدهکوونکو تر دې وړاندې هم د ښوونیز نظام د زوړوالي په اړه شکایتونه کړي او په وینا یې، اوس د زدهکړې لپاره د ښوونځیو د کتابونو محتوا بسنه نه کوي.
