ولايتي چارواکي وايي، له وسلهوالو طالبانو سره غږېدلي او مخامخ يې ور سره د ښوونځيو خلاصولو خبره منلې؛ خو عملاً يې لا څه نهدي کړي.
د پکتيا والي شميم خان کټوازی وايي، د قومي مشرانو په منځګړيتوب له وسلهوالو طالبانو سره خبرې کوي چې د ښوونځيو د تړلو لامل معلوم او په اړه يې اقدام وشي.
ده ډاډ ورکړ چې په پوره توان سره هڅه کوي چې د نجونو ټول ۱۳ تړل شوي ښوونځي بېرته پرانیزي.
په تړلو ښوونځيو کې يوه لېسه، يو منځنی او پاتې هغه لومړني ښوونځي دي.
د پکتيا د ولايتي شورا غړی حفيظالله مبارز په زرمت ولسوالۍ کې دا يوه لويه ستونزه بولي او وايي، د زرمت ترڅنګ په جانيخېل نورو ولسواليو کې هم د خلکو مينه له خپلو ماشومانو، ښوونځيو او هېواد پالني سره کمه شوېده.
د پوهنې رييس کوچی ځاځی بیا وايي چې يادې ولسوالي ته څوک د تګ لهپاره زړه نه ښه کوي او يو دوره نجونې بايد له ښوونځيو فارغې شي چې بېرته په همدې سيمو کې مقررې شي او ستونزه د تل لهپاره حل شي.
ښاغلی ځاځی زیاتوي، دوې اوونۍ مخکې په وزي په ګردهڅېړۍ او ښواک ولسواليو کې د نجونو دوه تړل شوي ښوونځي د خلکو په مرسته پرانيستل شول.
خو د وسلهوالو طالبانو وياند ذبيحالله مجاهد سلام وطندار ته وويل چې ياد ښوونځي يې د ښځينه ښوونکیو د نهشتوالي له امله تړلي او د ستونزې تر حله به همداسې پاتې وي.
مجاهد همدارنګه وايي چې پهدې اړه يې د پوهنې ریاست مسوولانو او ځېنو موسېـسو ته ويلي چې د نجونو د مکتبونو لهپاره ښځينه ښوونکې وګوماري؛ خو په وینا يې، تر اوسه په دې اړه څه نهدي شوي.
زرمت د پکتيا تر ټولو لويه او ګڼ نفوسه ولسوالي ده چې ۶۳ ښوونځي لري؛ خو له نيمايي زيات يې ودانۍ نهلري.
