د سياسي چارو ځينې شنونکی وايي، چې افغان حکومت تر ډېره بريده د پېښو سره سم دريځ نه نیسي.
دوی وايي، چې د پاکستان پر وړاندې د حکومتي چارواکو وروستی دريځ هم له احساساتو سرچينه اخلي.
دا څرګندونې په داسې حال کې ترسره کيږي، چې د پاکستان لومړي وزیر له اجرايوي ریيس غوښتي و، چې د ملګرو ملتونو د عمومي غونډې په حاشیه کې غواړي د دواړو هیوادونو په ورستيو اړیکو او وضعیت سره خبرې اترې وکړي؛ خو اجرايوي رییس عبدالله عبدالله د پاکستان د لومړي وزیر دا غوښتنه رد کړې ده.
حکومت ته ځېنو نږدې سرچينو سلام وطندار ته وویل، چې افغان حکومت ته په رسمي ډول وړاندیز کړی، چې یا دې ورسره د ترهګرۍ پر وړاندې مبارزه کې ريښتيني ملګرتیا وکړي او یا به پاکستان په انزوا کې پاتې وي.
د سیاسي چارو شنونکي محب شریف وايي، چې افغان حکومت تر ډیره بریده د پيښو سره سم دريځ نه غوره کوي.
شریف زیاتوي، چې د افغان حکومت ډيپلوماسي لا هم خام حالت لري.
محب الله شریف په وينا اوس هم د افغانستان ډېپلوماسي سرو ليکو او پالیسو څخه محروم دی.
شریف داهم وايي، په کابل کې د ولسمشر محمد اشرف غني هغه څرګندونې چې وايي ولس دې د پاکستاني درمل پرځای هندي درمل واخلي او په ملګرو ملتونو کې د عبدالله په ژبه د نواز شریف سره د نه لیدو خبره په سیاست کې د یوه سرچینې ښکارندويي کوي.
شریف زیاتوي، چې غني د حکومت په لومړیو کې د پاکستان پر وړاندې د ډيپلوماسۍ له سرې کرښې تیر د پاکستان څارګرې ادارې (آې، ایس، آې) مرکز ته ور ننوت او پاکستان ته يي هغه څه ورکړل، چې پخواني ولسمشر حامد کرزي نه وو ورکړي.
په همدې اړه د سیاسي چارو بل شنونکي محمد ناطقي وايي، چې د ملي یووالي حکومت په تېرو ۱۱ میاشتو کې د پاکستان سره د اړیکو ښه کېدو هڅې ګړندۍ کړې وې، خو پاکستان په دې برخه کې ریښتنی اقدام ونه کړ.
ناطقي زیاته کړه، چې د افغانستان پر وړاندې د پاکستاني مفتیانو د جګړې فتوا ورکول، په کابل، ولایتونو کې چاودنو برسېره له ترهګرو څخه د پاکستان ملاتړ اجرایوي ریېس دې ته اړ کړ، چې نواز شریف ته د خبرو کولو په باب د رد ځواب ورکړي.
ناطقي وايي، چې د پاکستان پر وړاندې د افغان حکومت دریځ د دواړو هېوادونو په زیان دی.
د هغه په خبره اوس هم پاکستان د ترهګرې په اړه د نړېوالو تر سختو فشارونو لاندې دی.
شنونکي ټينګارکوي، چې افغان حکومت د ټولو امکاناتو او ریښتینولی پاکستان سره د ترهګرۍ پروړاندې لاس یو کړ، خو پاکستان بیا د افغانستان پروړاندې دوه مخی چلند وکړ او د خپلو غلطو پالیسو په کارولو سره دغو اړيکو ته صدمه ورسوله.
دا په داسې حال کې ده، چې تېره ورځ ولسمشر محمد اشرف غني يوځل بیا ټينګار وکړ، چې سوله د افغانانو حق دی او حکومت يې له چا نه په زارۍ نه شي غوښتی.
