د افغانستان بهرنيو چارو وزارت اعلام کړی، چې د دغه وزارت له خوا د افغانستان، پاکستان، چين او امريکا هېوادونو ترمنځ د سولې خبرو اترو د دویم پړاو ترسره کېدو له پاره چمتووالی نیول شوی دی.
د دغو خبرو اترو لومړی پړاو د پاکستان په پلازمينه اسلام اباد کې ترسره شوه او په پام کې ده، چې په راتلونکي دوشنبې ورځ ( جنوري ۱۸مه) د افغان سولې د بهیر څلور اړخیزې غونډې دویم پړاو په کابل کې ترسره شي.
د بهرنيو چارو وزارت ویاند شکیب مستغني سلام وطندار ته وویل، چې په دغه پړاو کې به د خبرو اترو پر نقشې او کړنلارې خبرې وشي.
د مستغني په وينا، د افغانستان د بهرنيو چارو وزارت سیاسي مرستیال حکمت خلیل کرزی، د پاکستان د بهرنيو چارو وزارت مرستیال اعزاز احمد چودري، د افغانستان په چارو کې د چين ځانګړی استازی دینګ شي جون او د افغانستان په چارو کې د امريکا ځانګړی استازی اولسن به په دغو خبرو اترو کې یو له اصلي ګډون کوونکو وي.
د سياسي چارو کارپوه میاګل وثیق وايي، چې د امريکا او چين هېوادونو شتون به دغه خبرې اترې لا موثرې کړي.
هغه وايي، چې دغه دواړه هېوادونه په پاکستان کې پراخ نفوذ لري او دوی کولی شي، چې د خپل نفوذ څخه په استفادې پر پاکستان فشار راوړي، ترڅو پاکستان مجبور شي، چې وسله وال طالبان د خبرو اترو میز ته کش کړي.
وثیق زیاته کړه، چې افغانستان نړېوالې ټولنې ته دا ثابته کړې، چې له تروریزم سره مبارزه یواځې د افغانستان داخلي جنګ نه دی او دغه جنګ بېلابېلې برخې لري.
له بل لوري ځينې سياسي شنونکي په دې اند دي، چې پاکستان د سولې په خبرو اترو کې دوه مخي کوي.
د افغانستان او پاکستان اړيکې په اسلام اباد کې د اسیا زړه هېوادونو له کنفرانس وروسته یوځل بیا په ښه کېدو شو.
له طالبانو سره د سولې د مخامخ خبرو اترو لومړنۍ ناسته د تېر ۲۰۱۵ م ز کال په لومړيو کې پېل شوې؛ چې د طالبانو پخواني مشر ملاعمر له مرګ وروسته دغه خبرې اترې تر يوې نامعلومې نيټې وځنډيدې او د کابل پر شاه شهيد سیمې له برید وروسته د پاکستان او افغانستان اړيکې په بې څاري ډول خرابې شوې.
په دې وروستیو کې د اسیا زړه هېوادونو په پنځمه ناسته کې پاکستان يوځل بیا د چين او امريکا د استازو په حضور دا ومنله، چې د افغانستان د سولې له بهیر سره به مرسته وکړي.
