کابل نینگ پلچرخی منطقه سیدهگی ناراضیلیک نمایش بوندن نیچه کون آلدین واشنگتنده اسلام بویوک پیامبری حضرت محمد (ص) نینگ کاریکاتورلری ترقه تیلگن ایکنلیگی سبب یولگه قوییلدی. اعتراضچیلر کابل نینگ باجخانهسی همده خصوصی بانکلردن بیریگه کیریش نیتده بولگن بیر چاغده زوروانلیککه ایلنگن. عینی گواهلرنینگ ایتیشیچه، حادثهده ایکی کیشی هلاک بولگن و باشقه اوچ نفر تن جراحتی آلگن.
کابل امنیه قوماندانی عبدالرحمن رحیمی واقعهده ایکی کیشی هلاک بولگن لیگینی رد قیلیب، اعتراضچیلر ایچیده قوراللنگن کیشی بولگن لیگینی ایتگن. اونگه کوره، تامانلر ارا اوق اوزیش نتیجه سیده ییتی کیشی یرهلنگن.
عینی گواهلر، اعتراضچیلر نمایشنی زوروانلیککه آلیب بارگن بیر چاغده پولیس نینگ عکس العملیگه دوچ کیلگنلیکلرینی ایتگنلر. جنرال عبدالرحمن نیمه اوچون اعتراضچیلر ایچیده قوراللی شخصلر بولگنی همده کیم گه قرهته اوق اوزگن لیکلری انیقلنمه گن لیگینی ایتگن. کابل امنیه قوماندانی، نمایشچیلر ایچیدهگی آدملر سوء استعمال بولگن لیگینی بیلدیرگن.
کابل امنیه قوماندانی عبدالرحمن رحیمی، « بیز حادثه عامللرینی تاپیش اوچون قیدیرو ایشلرنی باشله گنمیز، نیمه اوچون کیشیلر قانونگه حرمت قیلمسدن اوز باشیمچه بوندی عملگه قول اورهدیلر».
شونینگ دیک کابل امنیه قوماندانی، واقعهده قولی بارلیککه گمان سیرهلیب تورت کیشی اوشلنگن لیگینی ایتگن. قوماندان، اعتراضچیلر ایچیده طالبلر بیراغینی کوتارگنلر کوزهتیلگن لیگینی هم تیلگه آلگن. ایتیلیشیچه، نمایشچیلرنینگ ایریم بانکلردن بیریگه هجوم قیلیش نیتده بولگنلر. پولیس اهالی نینگ دکانی همده موترلریگه زیان ییکزیلمسلیگی اوچون اعتراضچیلرنی ترقه تیب یوباریشگه اولگورگن.
کابل پولیس قوماندانلیگی نینگ سوزلاوچیسی حشمت الله استانکزی، نمایشده 400 – 500 کیشی قتنشگن لیگینی معلوم قیلگن. او، نمایش اوتکزیلشی اوچون پولیس تامانیدن اعتراضچیلرگه هیچ قندی قانونی رخصت بیریلمه گنلیگینی ایتگن. شونینگ دیک مسالهگه قرشی اوتگن هفته هم کابل، هرات، غزنی و پکتیا ولایت لریده ناراضیلیک نمایشلر یولگه قوییلگن ایدی. هراتده نمایش اوتکزگنلر، فرانسه نینگ افغانستان دهگی ایلچی خانهسی مملکتدن چیقاریلیشینی سورهگن ایدیلر.
