کابل حوزه‌سیده‌گی اعتراضچی نامزدلردن کمیده 300 ته‌سی اوشبو ولایت آوازلری‌نینگ بیکار ایتیلیشی‌نی طلب قیلگنلر.
بوگون "شنبه" کابلده بیر خبری ییغین اوتکزگن اعتراضچی نامزدلرنینگ ایتیشیچه، کابل حوزه‌سی سیلاوی‌نینگ نتیجه‌سینی قبول قیلمه‌یدیلر و اوشبو ولایت سیلاوی‌نینگ قیته‌دن یولگه قویلیشی کیره‌ک.
اعتراضچی نامزدلردن بیری عرفان‌الله عرفان‌نینگ ایتیشیچه، قول‌لریگه کابل حوزه‌سیده‌گی نماینده‌لر کینگشی سیلاویده صورت تاپگن ساخته‌کارلیک‌نی اثبات قیله‌دیگن ایترلیچه حجت بار دیر.
او، کمیسیون اعضالریدن، سیلاولر شکایت‌لرینی تینگلش کمیسیونی‌نینگ سابق قراری اساسیگه کابل آوازلری‌نینگ بیکار اعلان قیلیشی‌نی سوره‌یدی.
عرفان‌نینگ ایتیشیچه، کابل حوزه‌سی‌نینگ سیلاوی قیته‌دن یولگه قویلگن صورتده، سیلاولر کمیسیونی‌نینگ کمیشنرلرینی چیکلنتیریلیب و باش قاره‌لاوچلیک‌که تانیتیلیشی کیره‌ک.
بیراق سیلاولر ایرکین کمیسیونی سوزلاوچیسی‌نینگ اورین باسری کبرا رضایی‌نینگ ایتیشیچه، کابل حوزه‌ده نماینده‌لر کینگشی سیلاوی‌نینگ قیته‌دن یولگه قویلیشی ناممکن دیر.
خانم رضایی گه کوره، نماینده‌لر کینگشی سیلاویده کم‌چیلیک‌لر صورت تاپگن، بیراق مالی و فنی قیین‌چیلیک‌لر باعث، سیلاونی قیته‌دن یولگه قویش امکانیتی یوق.
کابل حوزه‌سی سیلاوی‌نینگ دستلبکی نیتجه‌سی 5 کون آلدین سیلاولر ایرکین کمیسیونی تامانیدن اعلان ایتیلدی.
