پایتخت کابل‌نینگ هواشناسلیک خیابانی‌ده نیچه کون ایچی‌ده آلدین – کیتین یوز بیرگن پارتلشلر بو منقطه یشاووچیلری‌نینگ اعتراضی‌گه سبب بولدی. اهالی بو منطقه‌ده‌گی خارجیلر قرارگاهی کوچیریلیشی‌نی دولت‌دن طلب قیلگنلر.
اهالی‌گه کوره، بو منطقه‌ده پارتلش یوز بیریشی‌نینگ بیرینچی دلیلی منطقه‌ده‌گی خلق ارا کوچلری‌نینگ حربی قرارگاهی موجودلیگی دیر. لیکن، دایم حادثه‌لرنینگ قربانی تینچ اهالی بوله‌دی. اعتراضچیلر حکومت‌دن کابل هوا قونالغه‌سی یقینی‌ده‌گی اوشبو حربی قرارگانی باشقه بیر معین ییرگه کوچیریب باریش‌نی سوره‌گنلر.
اعراضچیلرنینگ سلام‌وطندارگه ایتیشیشلریچه، اوتگن کون یوز بیرگن پارتلش‌ده منطقه یشش بنالریگه زیان ییتگن.
سونگی بیر آی ایچی‌ده کابل قونالغه‌سی یقینی‌ده جایلشگن هواشناسلیک عمومی یولی‌ده بیر نیچه بار پارتلش روی بیردی.
بو منطقه اهالیسی‌دن بیری حاجی عبدالاحدنینگ سوزلری‌گه‌کوره، اوتگن کون یوز بیرگن پارتلش عاقبیتی‌ده خانه‌دانی‌نینگ بیش اعضاسی تن جراحتی آلگن.
مذکور خیابان‌ده اویی جایلشگنلردن باشقه بیری بابه‌جان‌گه کوره، « بوندن ایکی کون آلدین صادر ایتیلگن پارتلش‌ده دوکانیم‌نینگ شیشه‌سی سینیب توشگن ایدی. مین بو شیشه‌لرنی ینگی‌دن آلگن ایدیم. لیکن، اوتگن کیچه روی بیرگن حادثه‌ده ینه سینیب توکیلدی. شیشه‌لر سینیب توکیلیشی عاقبده باله‌لر یم یره‌لندی، حیران من قه‌ییرگه بارسم»
ایچکی ایشلر وزیرلیگی اوتگن آقشام یوز بیرگن پارتلش‌ده ایکی کیشی شهید بولیب، باشقه 36 انسان یره‌لنگن دیگن. وزیرلیک رسیملری‌نینگ یره‌لنگنلردن 9 ده عیال بولگن‌لیگی‌نی بیلدیرگنلر.
وزیرلیک‌نینگ سوزلاووچی‌سی صدیق صدیقی‌نینگ بوگون (سه‌شنبه) کابل‌ده اوتکزیلگن بیر خبری ییغین‌ده ایتیشیچه، اوتگن کیچه‌که پارتلش یوک تاشووچی موترگه جایلشتیریلگن پارتلاووچی ماده آرقه‌لی صادر ایتیلگن. پارتلش‌دن نیت هم خارجیلر حربی قرارگاهی‌نی نشانگه آلیش بولگن. صدیقی، هجوم‌ده تینچ اهالی‌گه زیان ییتگن‌لیگی‌نی تصدیق‌له‌گن.
شونینگ‌دیک سنا مجلسی اوتگن آقشام کابل‌نینگ هواشناسلیک منطقه‌سی‌ده یوز بیرگن پارتلش‌نی جدی قاره‌لب، امنیتی اداره‌لردن بو مساله‌لر اوچون قتیق اعتبار قره‌یتیش‌نی طلب قیلگنلر.
افغانستان‌ده خلق ارا کوچلری قوماندانی‌نینگ سوزلاووچی‌سی جنرال ویلسن، اوتگن آقشام خلق ارا کوچلری حربی قرارگاهی یقینی‌ده صادر ایتیلگن خودکش هجومنی جدی قاره‌له‌گن.
