کابل تیزلیک‌ده چین و پاکستان تشقی ایشلر وزیرلری‌گه میزبانلیک قیله‌دی و بو اوچره‌شوودن سونگ، پاکستانلیک بیر هیأت افغانستان تینچلیگی خصوصیده، تورت تامانلمه ییغین زمانی و اورنینی معلوم قیلیشی ممکن.
جمهور رییس سوزلاوچیسی اورین باسری دواخانه مینه‌پال‌نینگ ایتیشیچه، اوشبو ییغین موضوع‌لریگه ترورچیلیک‌که قرشی کوره‌ش و افغانستان تینچلیگی‌نینگ رولی قنده‌یلیگی شامل بوله‌دی. جناب مینه‌پال گه کوره، اوشبو ییغینده پاکستاندن تینچلیک لایحه‌سیگه تَن بیرمه‌یدیگن افغانستان دولتی‌گه قرشی قوراللی عصیانچی‌لرنینگ برابریده تیزلیک‌ده جدی تدبیر آلیشی سوره‌له‌دی.
شونینگ‌دیک، تینچلیک عالی کینگشی‌نینگ خلق ارا ایشلر بوییچه مصلحتچیسی اسماعیل قاسمیارنینگ ایتیشیچه، پاکستانلیک هیأت‌نی کوتماقده‌لر و افغانستان تینچلیگی توغریسیده، اسلام آبادنینگ توشونچه‌سی اوزگرگن صورتده؛ اوشبو ییغین ایجابی نتیجه بیریشی ممکن.
تحلیلچی‌لرنینگ ایشانچی‌گه کوره، بو مرته احتمال باریچه تینچلیک تورت تامانلمه ییغینی نتیجه بیره‌دی؛ چونکه اسلام‌آباد خلق ارا باسقین‌لریگه روپه‌ره بولیب تورگن. اولرنینگ ایتیشیچه، منطقه‌ده ینگی بیرلشیک‌لر تشکیل ایتیلماقده و باشقه بیر تاماندن ناتو کوچلری افغانستان‌نی ترک ایتمه‌یدی و شو یوز دن افغانستان تینچلیگی‌گه امید بیلدیریش کیره‌ک.
سیاسی تحلیلچی محمدحسن حق‌یارنینگ ایتیشیچه، اسلام‌آباد سیاستی و منطقه اوزگریشلریگه قره‌گنده پاکستان سابق موضوعی‌ده ایمس دیر. اونگه کوره، طالب‌لر باشقه مملکت‌لر بیلن علاقه باغله‌گن، بیراق افغانستان تینچلیک لایحه‌سیده، اسلام‌آباد رولی‌دن انکار قیلیب بولمه‌یدی.
تینچلیک لایحه‌سیگه طالب‌لرنی جلب ایتیش اوچون حاضرگه‌قدر افغانستان، پاکستان، چین و امیریکه قوشمه ایالت‌لری‌نینگ اشتراکی‌ده کابل و اسلام‌آباد ده بیش دور تورت تامانلمه ییغین یولگه قوییلدی، بیراق تینچلیک ایسته‌گی طالب‌لر تامانیدن رد ایتیلگنی و اوشبو گروه‌نینگ هجوملری شدت‌لنگنی‌گه قره‌گنده بو ییغین‌لر نتیجه بیرمه‌گن.
