بوگون «دوشنبه» جمهور رئیس، اجراییه باشلیغی و مملکتنینگ قطار بلند مرتبهلی رسمیلرینینگ حضوریده سیلاولر کمیسیونلرینینگ ینگی اعضالری قانون گه وفادارلیک خصوصیده آنت ایچگنلر.
سیلاولر کمیسیونلرینینگ ینگی اعضالرینی آنت ایچیش مراسمی بوگون توشدن آلدین جمهورلیک سراییده یولگه قوییلگن.
جمهور رئیس غنینینگ ایتیشیچه، قانون اساسیده، سیلاولر کمیسیونلری اعضالریدن هیچ بیرینینگ سیاسی حزب ده فعالیت قیلیش گه حقی یوق دیر، «ایلگریدن سیاسی حزبلر بیلن بولگن علاقهلری کیسیلهدی و بوندن کیین هرقندهی علاقهلری تخلف سنلهدی.»
جناب غنی سیلاولر کمیسیونلرینینگ ینگی اعضالریدن فساد آلدی آلینیشی و وظیفهلردن سوء استعمال قیلینمهسی اوچون قوشمه بیر ییغینده «کمیشنرلرنی قارهلاوچی» مشخص بیر مِکانیزم قوریشلرینی سورهدی.
جمهور رئیس غنی سیلاولر کمیسیونلرینینگ ینگی اعضالری گه سوز بیریب ایتیشیچه، حکومت مذکور کمیسیونلرنینگ ایشلریده بولهدیگن هرقندهی ارهلشووگه توسیق بولهدی.
شونینگدیک، جناب غنی سیلاولر کمیسیونلریدن جمهورلیک ریاستینینگ سیلاوی، ولایتی کینگشلر سیلاوی، غزنی ولایتیده نمایندهلر کینگشینینگ سیلاوی و تومنلر کینگشلری سیلاوی یولگه قوییلیشی اوچون تیارگرلیک آلیب و شونینگدیک، نمایندهلر کینگشی سیلاوینینگ قالگن نتیجهسی توغریسیده تیزلیککه قرار قیلیشلرینی سورهگن.
اوشبو مراسمده ملی بیرلیک حکومتینی اجراییه باشلیغی عبدالله عبدالله نینگ ایتیشیچه، اوتمیشده سیلاولر کمیسیونلری و مذکور کمیسیونلرنینگ دبیرخانه ریاستلری آرهسیده ییترلیچه اویغونلیک یوق ایدی و حاضر بو کمچیلیکلر اورتهدن کوتریلیشی کیرهک.
جناب عبدالله نینگ کوپهیتیریشیچه، ملی بیرلیک حکومتی سیلاولر کمیسیونلرینینگ ایرکینلیگی سقلهنیشی توغریسیده سوز بیرهدی و مذکور کمیسیونلر اوچون ییترلیچه امکانیت یرهتهدی.
اجراییه باشلیغی تینچلیک و سیلاونی ایکی ایری موضوع بیلیب ایتیشیچه، حکومت سیلاو یولگه قوییلیشی یانیده تینچلیک تأمینلنیشی توغریسیده هم سعی و حرکت قیلهدی.
سیلاولر کمیسیونلرینینگ ینگی اعضالری باشقه ایکی کونگچه بیرینچی ییغینلریده مذکور کمیسیونلرنینگ باشلیغلری و اورین باسرلرینی تنلب و رسمی شکلده ایشلرینی باشلهیدیلر.
سیلاولر کمیسیونلرینینگ اعضالیگی اوچون 81 کیشی نامزد بولگن ایدی و بو جملهدن 16 تهسی جمهورلیک ریاستی سیلاوینینگ نامزدلری تامانیدن کوپینچه آواز قولگه کیریتگنلر و جمهور رئیس غنی ایری فرمانلرده 16 کیشینینگ آرهسیدن 7 تهسینی سیلاولر ایرکین کمیسیونی گه، 5 تهسینی سیلاولر شکایتلرینی تینگلش کمیسیونی گه و باشقه 2 تهسی مذکور کمیسیونلرنینگ دبیرخانه باشلیغلری صفتیده تانیشتیرگن.
سیلاولر ایرکین کمیسیونینینگ اعضالری صفتیده اورنگ زیب، مولانامحمد عبدالله، سیدعصمتالله مل، مسافر قوقندی، حوا علم نورستانی، محمدحنیف دانشیار و رحیمه ظریفی و شونینگدیک، سیلاولر شکایتلرینی تینگلش کمیسیونینینگ اعضالری صفتیده محمدقاسم الیاسی، زهره بیان شینواری، دینمحمد عظیمی، سیدقطبالدین رویدار و محمدیونس طغرا تانیشتیریلگنلر.
شونینگدیک، جمهور رئیس غنی سیلاولر ایرکین کمیسیونینینگ دبیرخانه باشلیغی صفتیده حبیبالرحمان ننگ نینگ و سیلاولر شکایتلرینی تینگلش کمیسیونینینگ دبیرخانه باشلیغی صفتیده چمنشاه اعتمادی نینگ تانیشتیرگن.
سیلاولر ایرکین کمیسیونلرینینگ سابق اعضالری کمیده بیر آی آلدین، مذکور کمیسیونلرده صلاحیتلریدن سوء استعمال قیلیش و مالی فسادگه عیبلنیب وظیفهلریدن چیکلنتیریلدی و اوندن سونگ، باش قارهلاوچیلیککه تانیشتیریلدیلر.
