د ژمي موسم په رارسېدو د افغانستان په ځینو ولایتونو په ځانګړي ډول غور او هرات ولایتونو کې واورې اورېدني او سخت توپان زیات هېوادوال له ګڼو ستونزو سره مخ کړي دي.
په غور ولایت کې د وروستیو واورو اورېدنو له امله د ۶ ولسوالیو د تګ را تګ لارې تړل شوي او په هرات کې ۵۳ زره کسان د سړې هوا او ژمي په راسېدو له ګواښ سره مخ دي.
د غور ولایت د لویدیځې برخې د ولسوالیو یو شمېر اوسېدونکو سلام وطندار ته وویل، چې د تېرې شپې د سختې واورې اورېدنې او شدید توپان له امله د غور له مرکز سره د دغو ولسوالیو د ورتګ لارې تړل شوي دي.
دغه اوسېدونکي وايي، چې ملکي روغتون د غور په مرکز کې دی، که چېرې دغه لارې ژر تر ژره خلاصې نه شي، ناروغان به خپل ژوند له لاسه ورکړي.
د غور ولایت د ټولګټو چارو رییس خلیل الله نوري د خلکو د ستونزو په تایید سره وايي، چې تراوسه د ټولګټو وزارت له خوا دغه ولایت ته د واورې پاکولو له پاره بودیجه نه ده ورکول شوې.
دی وايي، چې له دې ټولو ستونزو سره به خپله هڅه وکړي.
د سالنګ لویه لار تړل شوې
د سالنګونو لویې لارې د ساتنې او خوندیتوب د ادارې مسوول جنرال محمد رجب سالنګي سلام وطندار ته وویل، چې د شدیدې واورې اورېدنې او توپان له امله د کابل ـ شمال لویه لار تړل شوې ده.
رجب وايي، چې دوی د شمال د نهو ولایتونو د مسافرو موټر د بغلان په خنجان ولسوالۍ او د پروان ولایت په تاجیکان سیمه کې د احتمالي خطر د رفع کېدو تروخته درولي دي.
د ژمي سړه هوا هرات کې د ۵۳ زره هېوادوالو ژوند ګواښي
د هرات ولایت د طبیعې پېښو سره د مبارزې ریاست رییس عبدالحمید مبارز حمیدي وايي، چې د دوی د څېړنو له مخې ۷ زره او ۵۰۰ کورنۍ چې ټولټال ۵۳ زره هېوادوال کېږي؛ د ژمي سړې هوا له ګواښ سره مخ دي.
د حمیدي پر خبره، د فراه، غور او بادغیس ولایتونو د بې ځایه شویو کورنیو زیاتوالی د دې لامل شوی، چې په هرات ولایت کې ۵۰ سلنه زیانمنې کورنۍ زیاتې شي.
د هرات ولایت د طبیعې پېښو سره د مبارزې د ادارې رییس وايي، چې د احتمالي انساني ناورین په اړه یې مسوولو چارواکو ته خبر ورکړی دی، خو تر اوسه یې ځواب نه دی ترلاسه کړی.
