چين به افغانستان سره د سولې راوستو په برخه کې مرستې وکړي
د بهرنيو چارو وزارت د ویاند مرستيال سراج الحق سراج سلام وطندار ته دیوې ځانګړې مرکې په ترڅ کې و ویل؛ چې د افغانستان، چين او پاکستان ترمنځ د خبرو اترو په لومړي پړاو کې چين افغانستان ته د سولې راوړو په برخه کې د مرستې ژمنه وکړه.
د دغو خبرو اترو مشري د افغانستان د بهرنيو چارو وزارت سياسي مرستيال حکمت خلیل کرزي، د چين د بهرنيو چارو وزارت مرستيال ليوجيانچاو او د پاکستان د بهرنيو چارو وزارت مرستيال اعزاز احمد چوهدري کوله.
د بهرنيو چارو وزارت د ویاند مرستيال زياتوي: « پاکستان د افغانستان په مشرۍ د سولې له پروسې خپل ملاتړ اعلان کړ.»
همدارنګه د ياد وزارت له لوري په راليږل شوې خبر پاڼه کې هم راغلي؛ د دريو هېوادونو چارواکي دې هوکړې ته ورسېدل، چې په افغانستان او سيمه کې د سولې او ټيکاو راوستو په موخه به خپلې هلې ځلې جاري ساتي؛ خو د پاکستاني او چينايي لوړ پوړو مقاماتو له لوري هم غوښتنه شوې، چې په دغه برخه کې رغنده ګامونه واخیستل شي.
افغان چارواکو هم د پاکستان او چين مرستې د افغانستان د سولې په برخه کې اړينې وبللې.
څه موده وړاندې د طالبانو ځينو لوړ پوړو مشرانو چين ته سفر کړي و او طالبانو هم دا منلي، چې دوی د چينايي چارواکو سره خبرې اترې کړي، خو په دغه برخه کې يې د چين منځګړيتوب په کلکه رد کړی.
خو دسولې عالي شورا بیا د چین منځګړيتوب ته په ښه سترګه ګوري او زیاتوي، چې چين به وکولی شي د طالب مشرانو او افغان حکومت ترمنځ خبرو ته لاره هواره کړي.
چين هغه هېواد دی، چې د پاکستان ډیره اقتصادي برخه پر دغه هېواد ولاړه ده او پر پاکستان بيا د ترهګریزو ډلو سره داړيکو په تور ګرم بلل کيږي.
د چارو کار پوهان بیا په دې نظر دي، چې دافغانستان په جګړه کې د چین بې پريتوب او پر پاکستان نفوذ کولی شي، چې پاکستاني چارواکي افغانستان کې سولې سره ښکاره او اغیز لرونکي مرستې ته اړ باسي.
