د پروان ولایت مرکز چاریکارو کې درې ورځې وړاندې راوتلو سېلابونو نه یوازې ۱۲۰کسان ووژل او ۱۳۰ نور یې ټپیان کړل؛ بلکې شبکې او مهمې او د خلکو د ژوند لومړنۍ زیربناوې یې هم له منځه یوړې.
د چاریکارو اوسېدونکي چې له ډېر وخت راهيسې د پاکو اوبو له نشته کړېږي، وروستیو سېلابونو یې شته د دولتي او خصوصي اوبو رسولو شبکې هم له منځه یوړې.
په پروان ولایت کې مدني فعالان په دې ولایت کې د حکومتي بنسټونو له ضعیف مدیریت نه ناخوښه دي او له پېښې وروسته راتلونکي ناورین ته د پاملرنې غوښتنه کوي.
د ياد ولايت مدني فعال منیب الحق وايي، خلک اوبو او برېښنا ته لاسرسی نه لري او د دې ښار اوسېدونکي شپې او ورځې له ګڼو ستونزو سره تېروي.
نوموړی له حکومته غواړي چې دا وضعیت هرڅه ژر پای ته ورسوي.
د پروان ځايي اداره د زېربناوو د له منځه تللو په برخه کې د دې ولایت له اوسېدونکيو سره هم نظره دی.
د پروان د والي ویاندې وحیدې شهکار سلام وطندار ته وویل، د ښار په کچه د پاکو اوبو د تامین لپاره د خلکو او مرستندويه بنسټونو له لوري هڅې روانې دي.
نوموړې د اوبو رسولو د شبکو، برېښنا، مخابراتو او د عمومي او فرعي لارو بیا جوړونه وخت نیوونکې بولي.
په چاریکارو ښار کې د سېلابونو له راوتو وروسته د حکومتي او نورو چارواکيو، خلکو او خیریه بنسټونو له لوري ډېرې ژمنې او مرستې شوې دي.
