د اوبو او انرژۍ وزارت مسوولان وايي، د تېرو کلونو په پرتله روان کال کې د اورښت کچه ۶۱سلنه کمه شوې او وچکالۍ خلک له ګڼو ستونزو سره مخ کړي دي.
د دې وزارت مرستیال خانمحمد تکل چې نن د کلیو پراختیا او بیارغونې او کرنې او مالدارۍ وزارت چارواکیو سره یوځای، د ولسي جرګې عمومي غونډې ته وربلل شوی و وویل، د وچکالۍ اغېزې کمولو او سېلابونو مخنیوي لهپاره یې ۲۶۵ پروژې ډیزاین کړي چې طرحه یې منل شوې او د عملي کولو لهپاره یې ۱۳ میلیونه ډالر هم منظور شوي دي.
د تکل په وینا، اوسمهال د اوبو د تاسیساتو لهپاره د ۲۷ میلیونو ډالرو په ارزښت په ۳۱ ولایتونو کې ۴۱ پروژې ترکار لاندې دي.
په همدې حال کې د کرنې او مالدارۍ وزارت مرستیال حشمتغفور وايي، د کرنې اوبو سپما په موخه هڅه کوي چې بزګرانو ته د اوبو لګولو نوې بڼه وروپېژني او د راتلونکي لهپاره د اړتیا وړ خوراکي توکي او د څارویو شومې زېرمه کړي.
د غفور په وینا، د کرنې او اوبو لګولو، د کلیو پراختیا او بیارغونې او اوبو او برېښنا وزارتونو د ولسمشر له پخواني امر سره سم د وچکالۍ پروړاندې مبارزې لهپاره طرحه چمتو کړې چې په عملي کولو سره به یې تر راتلونکي کاله اوسنۍ ستونزې کمې شي.
بلخوا د کلیوپراختیا او بیارغونې وزیر مجیبالرحمان کریمي د ولسي جرګې عمومي غونډې کې وویل، د وچکالۍ د اغېزې کمولو لهپاره یې تر ۲۰۰ ډېرو ژورو او نیمهژورو څاګانو کیندلو ترڅنګ، د اوبو رسولو ۱۶۴ شبکې بشپړې کړي او یوشمېر نورې به یې د دې کال ترپایه بشپړې شي.
نوموړي زیاته کړه، په پام کې لري چې په راتلونکیو دوو اوونیو کې د کلیوالي صنایعو پروګرام پیل کړي چې ۵۰۰ زرو ښځو ته به پهکې کار پیدا شي. دغه راز د ۱۳ ولایتونو لرې پرتو سیمو ته هم سولري برېښنا ورسوي.
