د افغانستان په شمال ختیځ کې یو حکومتي چارواکی ادعا کوي، چې وسلهوال طالبان د وسلو او نظامي مهماتو په بدل کې له امنیتي ځواکونو نیول شوي ټانکونه روسیې ته ورکوي.
د کندوز ولایت د دشت ارچي ولسوال نصیرالدین سعدي وايي، "دا یو حقیقت دی" چې په تېرو درېیو میاشتو کې وسلهوالو طالبانو له امنیتي ځواکونو ۴ نیول شوي امریکايي هاموي ټانکونه د "کیمې" په وسیله د امو سیند له لارې تاجکستان ته لېږدولي دي.
کیمه هغه وسیله ده، چې په ځينو ځایونو کې د سیند پر غاړه د پُل پر ځای استعماليږي او خلک د کېبلونو پواسطه له سینده پورې وځي.
د دشت ارچي ولسوال وايي، دغه ولسوالۍ له تاجکستان سره ۵ کیلو متره ګډه پوله لري، چې طالبان د دې ولسوالۍ په شاهروان او د ملاقلي په نوم سرحدي سیمه کې واک لري.
دی وايي، وسلهوال طالبان له همدې سیمو د کیمه په وسیله امریکايي ټانکونه روسانو ته سپاري او په مقابل کې یې وسلې او مهمات اخلي.
هڅه مو وکړه، چې په دې اړه په افغانستان کې د روسیې سفارت نظر هم واخلو، خو د پرلپسې اړیکو سره ـ سره بریالي نه شو.
په دې وروستیو کې رسنیو د طالبانو او روسانو اړیکو په اړه راپورونه هم خپاره کړي وو.
له دې مخکې د فراه او کندوز والیانو ادعاوې کړې وې، چې روسیه له طالبانو ملاتړ کوي او په دې اړه اسناد هم لري.
شاوخوا دوه اونۍ مخکې په افغانستان کې د روسیې سفیر الکساندر مانتیتسکي ویلي و، چې روسیه یوازې په افغانستان کې د خپل سفارت او ډيپلوماتونو د امنیت خوندیتوب له پاره له طالبانو سره اړیکې لري.
نوموړي ویلي و، چې روسیه یوازې له افغان دولت سره تخنیکي او نظامي مرستې کوي.
