تخار ولایتی‌ده ناقانونی قورال‌لی کیشی‌لر قومندانی ملا پیرم‌قل‌گه تیگیشلی قورال‌لی کیشی‌لر، مذکور ولایت‌نینگ رستاق تومنی یشاوچیلری ناراضیلیک نمایش‌نی راکت آرقه‌لی نشان‌گه آلگن. رستاق یشاوچی‌لریدن بیری‌نینگ ایتیشیچه، اوشبو راکت آتیش‌لر نتیجه‌سیده 7 کیشی یره‌لنگن.
رستاق یشاوچیلری، تخار ولایت کینگشی‌نینگ سابق اعضاسی عین‌الدین رستاقی و ملا پیرم‌قل طرفدارلری اورته‌سیده‌گی توقنه‌شوولر شدت‌لنگنی و شونینگ‌دیک، رستاقی‌نینگ اولیم قضیه‌سی تیکشیریلیشی خصوصیده، ناراضیلیک نمایش یولگه قویگن‌لر.
ایتیلیشیچه، اعتراضچی‌لر ترقه‌تیب یوباریش اوچون، پیرم‌قل نفرلری، اعتراضچی‌لر تامان 16 راکت آتگن.
تخار ولایتی ساغلیق‌نی سقلش ریاستی باشلیغی داکتر حفیظ‌الله صافی‌نینگ ایتیشیچه، واقعه محلی‌دن ایکی یره‌دار کیشی تالقان کسلخانه‌سیگه آلیب کیلینگن. جناب صافی‌گه کوره، اوشبو یره‌لنگن‌لردن بیری 17 یاشر ییگیت بولیب کسلخانه‌ده جان بیرگن و باشقه بیراوی‌نی هم ساغلیک وضعیتی اونچه‌لیک یخشی ایمس دییدی.
سلام‌وطندار محلی خبرچیسی‌نینگ ایتیشیچه، رستاق تومنی‌گه هجوم اویوشتیرگن پیرم‌قل‌گه تیگیشلی کیشی‌لر رقمی، 200 دن 300 کیشی‌گه ییتیشه‌دی.
شونینگ‌دیک، تخار ولایتی‌نینگ رستاق تومنی‌ده امنیتی منبع‌لردن بیری، بو واقعه‌نی تصدیق‌لب سلام‌وطندارگه ایتیشیچه، تومن بناسی‌دن باشقه رستاق‌نینگ برچه منطقه‌سی، مذکور ناقانونی قومندان‌گه تیگیشلی کیشی‌لر نظارتی‌ده بولگن.
محلی حکومت رسمی‌لری، حاضرگچه بو توغریده عکس‌العمل بیلدیرمه‌گن و حاضرگه‌قدر مرکزی حکومت تامانیدن مذکور تومن‌گه هیچ قنده‌ی حربی یاردم یوباریلمه‌گن.
