پکتیکا ولایتی کینگشی باشلیغی افسرخان سلمانخیلنینگ ایتیشیچه، وازیخواه، ورممی و تروی تومنلرینینگ قتناو یوللری پکتیکا مرکزی و شونینگدیک زابل و غزنی ولایتلری بیلن یاپیلگن. جناب سلمانخیلنینگ ایتیشیچه، مذکور اوچ تومننی قتناو یوللری یاپیلگنی باعث، کمیده 120 مینگ کیشی ییگولیک ماده کملیگیگه روپهره بولگن.
پکتیکا ولایتی کینگشی باشلیغیگه کوره، مذکور تومن طالبلر تامانیدن قورشاوگه آلینگنیدن کیین، ییگولیک ماده قیمتی جوده هم یوقاری کوتریلگن. حاضر بیر 50 کیلولیک بوجی اون بهاسی 7 مینگ کلدار (کمیده 3000 افغانی) بولهدی.
اوچ هفتهدن بویان وازیخوان تومنیده قوراللی طالبلر بیلن امنیتی کوچلر اورتهسیده جدی شکلده اوروش دوام ایتماقده. اروش دوامی محل یشاوچیلرینینگ قیینچیلیککه روپهره قیلگن.
وازیخوان تومنی یشاوچیلریدن بیرینینگ سلاموطندارگه ایتیشیچه، طالبلر مذکور تومن بیلن مرکز اورتهسیدهگی قتناو یوللرنی توسگن و اوشبو یوللر توسیلگنیدن بویان یشاوچیلرنینگ کیرهکلی نرسهلری آز تاپیلهدی و تاپیلگن صورتده هم بهاسی جوده یوقاری دیر. وازیخوان یشاوچیلریدن بیری سعداللهنینگ ایتیشیچه، طالبلر اوشبو تومننی تورت تامانیگه ماین ییرلشتیرگن و کیمسه بو تومندن چیقهآلمهیدی.
وازیخوان تومنی چیگره کندکی قومندانی امانالله خاننینگ ایتیشیچه، مرکزی حکومت تامانیدن، مذکور تومن امنیتی کوچلریگه حربی جهاز ییتکیزیلیب و یا تیک اوچرلر طالبلرنینگ سنگرلرینی بمبارد قیلگن صورتده، قورشاو سینیشی ممکن.
محل یشاوچیلرینینگ ایتیشیچه، مرکزی حکومت تامانیدن، اوشبو قورشاو یکونلنمهی و قتناو یوللر آچیلمهگن صورتده، ایسلنگن اوچ تومنده ییگولیک ماده کملیگی نتیجهسیده، انسانی فاجعه یوزبیریشی ممکن.
